مقدس مقامات کی زیارات کرانے کے مجاز زائرین گروپ آرگنائزرز کی رجسٹریشن کا عمل مکمل ، سرٹیفکیٹ جاری

جمعہ 29 اگست 2025 16:50

اسلام آباد (اُردو پوائنٹ اخبارتازہ ترین - اے پی پی۔ 29 اگست2025ء) ایران،عراق اور شام کے مقدس مقامات کی زیارات کرانے کے مجاز زائرین گروپ آرگنائزرز کی رجسٹریشن کا عمل مکمل ہونے کے بعد مجاز ’’زیارت گروپ آرگنائزرز ‘‘ کو سرٹیفکیٹ جاری کر دیئے گئے ۔ جمعہ کو سرٹیفکیٹس کے اجرا ء کی تقریب سے خطاب کرتے ہوئے وزیر مذہبی امور سردار محمد یوسف نے تمام رجسٹرڈ زیڈ جی اوز کو مبارکباد پیش کی اور کہا کہ زیارت کی مجاز کمپنیاں زائرین کے سفر ، رہائش، خوراک اور دیگرسہولیات کی فراہمی کو یقینی بنائیں۔

(جاری ہے)

موجودہ حکومت نے زیارت پالیسی کو نافذ کرنے کا عمل شروع کیا ہے۔حکومت نے فیصلہ کیا ہے کہ موجودہ سالار سسٹم جلد مکمل طور پر ختم کر دیاجائے گا۔ایران، عراق ، شام کے زائرین صرف رجسٹر ڈ زیڈ جی اوز کے ذریعے سفر کر سکیں گے۔نئے نظام کے ذریعے زائرین کو بہتر سہولیات، شفاف طریقہ کار ، اور محفوظ سفر مہیا کیا جائے گا۔وزارت مذہبی امور کو اب تک رجسٹریشن کے لئے 1,413 درخواستیں موصول ہوئی ہیں۔اب تک 585 کمپنیوں کو سیکورٹی کلیئرنس ملی ہے ۔پہلے مرحلے میں 24 کمپنیاں مطلوبہ دستاویزات مکمل کرنے پر رجسٹریشن کے لئے اہل قرار پائی ہیں۔باقی کمپنیوں کو مطلوبہ دستاویزات مکمل کرنے پر رجسٹریشن سرٹیفکیٹ جاری کیا جائے گا۔