Live Updates

ہمارے پاس بند پر شگاف ڈالنے کا آپشن نہیں، ہم سپر فلڈ کی تیاری کر رہے ہیں،جام خان شورو

جمعہ 29 اگست 2025 16:55

اسلام آباد (اُردو پوائنٹ اخبارتازہ ترین - این این آئی۔ 29 اگست2025ء)وزیر آبپاشی جام خان شورو نے کہا ہے کہ دریا کے بہاؤ کو مانیٹر کر رہے ہیں، ہمارے پاس بند پر شگاف ڈالنے کا آپشن نہیں ہوتا، ہم سپر فلڈ کی تیاری کر رہے ہیں۔جام خان شورو نے نجی ٹی وی سے گفتگو کرتے ہوئے کہا کہ چناب میں دس بارہ سال بعد اس طرح کی سیلابی صورتحال ہے، 11 لاکھ کیوسک پانی تریمو کی جانب جا رہا ہے، راوی اور ستلج پر گنڈاپور کے مقام پر 2 لاکھ 60 ہزار کیوسک پانی ہے۔

(جاری ہے)

جام خان شورو نے کہا کہ ٹرینڈ یہ رہا ہے کہ پنجند پر پہنچنے سے پہلے پہلے پانی کا بہاؤ کم ہو جاتا ہے، پنجند پر پانی ملے گا جس کے بعد دو روز کا وقت ہوگا۔انہوں نے کہا کہ میں دو روز سے سکھر میں ہوں، بندوں پر وزراء کی ڈیوٹیز لگی ہوئی ہے، پنجند سے گڈ و تک پانی آنے میں دو روز کا وقت ہوگا، ڈپٹی کمشنر اور کمشنرز نے کیمپ کے لیے مقامات کی نشاندہی کر دی ہے۔جام خان شورو نے کہا کہ سکھر بیراج کا اسٹرکچر کئی سال پرانا ہے، گیٹ تبدیل کر رہے ہیں، سکھر بیراج کے مزید گیٹ آئندہ سال تبدیل کردیں گے، گڈو بیراج کی گنجائش 12 لاکھ کیوسک ہے، سکھر بیراج کی گنجائش 9 لاکھ 60 ہزار کیوسک ہے، کوٹری بیراج کی گنجائش 8 لاکھ 70 ہزار کیوسک ہے۔