اوسلو ، مسجد کو نشانہ بنانے کی منصوبہ بندی کا انکشاف،جرمن نژاد دہشتگرد گرفتار

جمعہ 29 اگست 2025 16:55

اوسلو(اُردو پوائنٹ اخبارتازہ ترین - این این آئی۔ 29 اگست2025ء)ناروے پولیس نے انکشاف کیا ہے کہ ایتھوپین نژاد سماجی کارکن کے قتل کے الزام میں گرفتار 18سالہ نوجوان نے اوسلو کی ایک مسجد پر حملے کی منصوبہ بندی بھی کر رکھی تھی۔غیر ملکی خبر رساں ادارے کے مطابق ملزم کو اوسلو کے ایک ہوسٹل میں 34سالہ سماجی کارکن تمیما نِبراس جوہار کے قتل کے بعد گرفتار کیا گیا۔

مقتولہ ہوسٹل کی اسٹاف ممبر جبکہ ملزم وہاں رہائشی تھا۔

(جاری ہے)

پولیس حکام نے بتایا کہ ملزم کے خلاف قتل اور دہشت گردی دونوں الزامات کے تحت تحقیقات جاری ہیں کیونکہ اس نے مسلمانوں کے خلاف نفرت پر مبنی خیالات کا اظہار کیا تھا۔ تحقیقات کے دوران ملزم نے بتایا کہ وہ اوسلو سے تقریباً 60کلومیٹر شمال میں واقع فوس کی ایک مسجد پر حملہ کرنا چاہتا تھا۔پولیس کے مطابق ابتدائی شواہد یہ ظاہر کرتے ہیں کہ نوجوان کی مزید حملے کرنے کی صلاحیت محدود تھی اور وہ اکیلا ہی کارروائی کر رہا تھا۔مقامی میڈیا رپورٹس میں دعویٰ کیا گیا کہ ملزم کی شناخت جرمن شہری جورجے ولمز کے طور پر ہوئی ہے جو بچپن میں سربیا سے ناروے آیا تھا، تاہم پولیس نے اس کی تصدیق نہیں کی۔