ایران کی جوہری پروگرام پر مذاکرات کی بحالی کے لیے آمادگی

جمعہ 29 اگست 2025 19:01

تہران(اُردو پوائنٹ اخبارتازہ ترین - آن لائن۔ 29 اگست2025ء)ایران نے اپنے جوہری پروگرام پر سفارتی مذاکرات دوبارہ شروع کرنے کی آمادگی ظاہر کر دی ہے۔ ایرانی وزیر خارجہ عباس عراقچی نے کہا ہے کہ اگر مغربی ممالک نیک نیتی اور سنجیدگی کا مظاہرہ کریں تو ایران منصفانہ اور متوازن مذاکرات کے لیے تیار ہے۔ { اپنے جاری بیان میں عباس عراقچی نے یورپی یونین کے خارجہ پالیسی سربراہ کو خط لکھا جس میں انہوں نے اعادہ کیا کہ ایران کسی بھی یکطرفہ دباؤ یا غیر منصفانہ رویے کو قبول نہیں کرے گا۔

ان کا کہنا تھا کہ دوسرے فریقین کو ایسے اقدامات سے گریز کرنا ہوگا جو مذاکرات کی کامیابی کے امکانات کو متاثر کریں۔یہ پیشرفت ایک ایسے وقت میں سامنے آئی ہے جب تین یورپی طاقتوںظ**برطانیہ، فرانس اور جرمنی**ظنے ایران پر اقوام متحدہ کی پابندیاں دوبارہ عائد کرنے کا عمل شروع کیا ہے۔

(جاری ہے)

یورپی ممالک نے سلامتی کونسل کو تحریری طور پر بتایا کہ ایران 2015 کے جوہری معاہدے کی خلاف ورزی کا مرتکب ہوا اور اپنے وعدوں پر پورا نہیں اترا۔

ایران نے یورپی اقدام کو ’’غیر معقول اور غیر قانونی‘‘ قرار دیتے ہوئے سخت ردعمل دیا ہے۔ تہران کا مؤقف ہے کہ ایران نے ہمیشہ معاہدے پر عمل کیا ہے لیکن مغربی ممالک نے اپنے وعدے پورے نہیں کیے۔بین الاقوامی تجزیہ کاروں کے مطابق یہ پیشرفت ایران اور مغربی طاقتوں کے تعلقات میں ایک نئے سفارتی موڑ کی نشاندہی کرتی ہے، جہاں مذاکرات کی بحالی اور ممکنہ تصادم دونوں امکانات موجود ہیں۔