ہماری انتھک محنت اور دانشمندانہ تعلیمی منصوبہ کے نتائج برآمد ہونا شروع ہو چکے ہیں،گورنربلوچستان جعفرخان مندوخیل

جمعہ 29 اگست 2025 21:10

کوئٹہ (اُردو پوائنٹ اخبارتازہ ترین - اے پی پی۔ 29 اگست2025ء) گورنربلوچستان جعفرخان مندوخیل نے کہا ہے کہ ہماری انتھک محنت اور دانشمندانہ تعلیمی منصوبہ کے نتائج برآمد ہونا شروع ہو چکے ہیں، آج پہلی بار بیوٹمز یونیورسٹی ژوب کیمپس کے پانچ ذہین اسٹوڈنٹس چین کیلئے منتخب ہونے کے بعد اپنے مزید تعلیمی سفر کا آغاز کر رہے ہیں جو تعلیمی تعاون اور عمدگی کے ایک نئی تاریخ رقم ہوئی ہے۔

یہ بات انہوں نے گورنر ہاؤس کوئٹہ میں کوآرڈینیٹر ٹو گورنر شہریار خان مندوخیل، بیوٹمز یونیورسٹی ژوب کیمپس کے ریکٹر ڈاکٹر عبدالسلام خان لودھی اور بوائز ڈگری کالج ژوب کے پرنسپل پروفیسر عبدالرحمٰن سے گفتگو کرتے ہوئے کیا۔ گورنر بلوچستان نے کہا کہ ژوب ڈویژن کو ایک اہم تعلیمی مرکز میں تبدیل کرنے کا خواب پورا ہونے کے قریب ہے۔

(جاری ہے)

ژوب میں تمام چھوٹے بڑے تعلیمی اداروں کی مکمل فعالیت اور اساتذہ کی حاضری کو یقینی بنانا مشکل کام تھا، اس میں محکمہ تعلیم کے تمام متعلقہ حکام اور ضلعی انتظامیہ کی کاوشیں لائق تحسین ہیں، ہمارے ژوب کے یونیورسٹی کیمپس اور کالجز مسلسل ترقی کر رہے ہیں جن کے اثرات ہر بدلتے دن کے ساتھ واضح ہوتے جا رہے ہیں۔

جعفرخان مندوخیل نے کہا کہ ہم ژوب ڈویژن کی سطح پر ایک شاندار تعلیمی سیمینار کے انعقاد کا ارادہ رکھتے ہیں۔ گورنر بلوچستان جعفرخان مندوخیل نے کوآرڈینیٹر شہریار پر زور دیتے ہوئے کہا کہ وہ اپنے انتظامات، متعلقہ سرکاری حکام اور تعلیمی ماہرین کے ساتھ رابطوں کو زیادہ تیز کریں، ڈویژن کی سطح پر ایک فکر انگیز ایجوکیشنل ایونٹ ہمارے نئے تعلیمی منظرنامے کو ضرور تشکیل دیگا۔ انہوں نے کہا کہ چند برس قبل ہم نے ژوب کیمپس میں زیتون کے چھ درخت لگانے کا ایک منفرد منصوبہ شروع کر دیا جن کو ہم چودہ ہزار تک پہنچائیں گے، یہی ہزاروں زیتون کے درخت یونیورسٹی کے اخراجات میں نمایاں طور پر کمی لانے میں مددگار ثابت ہونگے۔