Live Updates

ڈپلومیٹک ایف سی اور پاکستان ویٹرنز نمائشی فٹ بال میچوں میں فتح یاب

ْ پہلے میچ میں ڈپلومیٹک ایف سی نے اسلام آباد ویٹرنز کو 3-2 سے زیر کیا۔ گبسن نے دو گول کیے پاکستان ویٹرنز نے ڈپلومیٹک سٹارز کے خلاف 4-2 سے کامیابی ‘عمران نیازی نے دو‘ میاں عباس اور اللہ نوازکا ایک گول

اتوار 31 اگست 2025 11:40

اسلام آباد(اُردو پوائنٹ اخبارتازہ ترین - این این آئی۔ 31 اگست2025ء)پاکستان کے 78ویں یوم آزادی کی مناسبت سے ڈریم سپورٹس گروپ نے ہفتہ کو پاکستان سپورٹس کمپلیکس کے جناح سٹیڈیم میں نمائشی فٹ بال میچز کا انعقاد کیا۔ ایونٹ میں دو سنسنی خیز مقابلے ہوئے جن میں ڈپلومیٹک ایف سی اور پاکستان ویٹرنز نے فتح حاصل کی۔ پہلے میچ میں ڈپلومیٹک ایف سی نے اسلام آباد ویٹرنز کو 3-2 سے زیر کیا۔

گبسن نے دو گول کیے جبکہ ایڈورڈ نے ڈپلومیٹک ایف سی کے لیے ایک گول کیا۔ اسلام آباد ویٹرنز کی جانب سے دونوں گول ناصر نے کئے۔دوسرے میچ میں پاکستان ویٹرنز نے ڈپلومیٹک سٹارز کے خلاف 4-2 سے کامیابی حاصل کی۔ پاکستان ویٹرنز کی جانب سے عمران نیازی نے دو اور میاں عباس اور اللہ نواز نے ایک ایک گول کیا۔

(جاری ہے)

ڈپلومیٹک سٹارز کی جانب سے دونوں گول امیکا نے کئے۔

تقریب میں مہمان خصوصی رکن قومی اسمبلی نوابزادہ میر جمال خان رئیسانی، صدر پی آئی اے سی بی اے ہدایت اللہ خان، صدر فاٹا اولمپک ایسوسی ایشن شاہد خان شنواری اور اسلام آباد فٹ بال ایسوسی ایشن کے صدر شیخ احمد ریحان سمیت نمایاں شرکاء نے شرکت کی۔تقریب میں غیر ملکی سفارت کاروں، کھیلوں کی شخصیات اور شائقین کی بڑی تعداد نے بھی شرکت کی۔

ڈریم اسپورٹس گروپ کے سی ای او ارسلان مشتاق نے کہا کہ نمائشی میچوں کا مقصد کھیلوں کو فروغ دینا اور سفارت کاروں اور پاکستانی عوام کے درمیان دوستانہ تعلقات کو فروغ دینا تھا۔ یہ تقریب ڈریم فیسٹیول کا حصہ تھی، جس میں نوجوانوں کی ترقی پر توجہ دی گئی۔ اختتامی تقریب میں فاتح ٹیموں، رنر اپ، مہمان خصوصی، کھلاڑیوں، ریفریز اور آفیشلز کو شیلڈز اور ٹرافیاں دی گئیں۔