محمد حارث نے آؤٹ ہونے پر اپنا بلا توڑ دیا، ویڈیو وائرل

وکٹ کیپر بیٹر آؤٹ ہوتے ہی غصے میں آگئے اور اپنا بلا زمین پر مار کر توڑ دیا جس کی ویڈیو سوشل میڈیا پر زیر گردش

اتوار 31 اگست 2025 12:35

شارجہ (اُردو پوائنٹ اخبارتازہ ترین - این این آئی۔ 31 اگست2025ء)پاکستان ٹیم کے وکٹ کیپر بیٹر محمد حارث نے آؤٹ ہونے پر اپنا بلا ہی توڑ دیا۔شارجہ میں کھیلے جارہے میچ میں پاکستان نے پہلے بیٹنگ کرتے ہوئے مقررہ اوورز میں 8 وکٹوں کے نقصان پر 219 رنز بنائے اور یو اے ای کو جیت کے لیے 220 رنز کا ہدف دیا۔پاکستان کی جانب سے صائم ایوب اور حسن نواز نے شاندار نصف سنچریاں اسکور کیں۔

صائم ایوب نے 38 گیندوں پر 69 رنز بنائے ان کی اننگ میں 7 چوکے اور 4 چھکے شامل تھے، حسن نواز نے 6 چھکوں اور دو چوکوں کی مدد سے 56 رنز بنائے۔

(جاری ہے)

فخر زمان 6 اور کپتان سلمان علی آغا 5 رنز بنا سکے، صاحبزادہ فرحان 8 رنز بنا کر بولڈ ہوئے، محمد نواز 15گیندوں پر 25 رنز بنا کر پویلین لوٹ گئے۔یو اے ای کی جانب سے صغیر خان اور جنید صدیق نے تین، تین کھلاڑیوں کو آؤٹ کیا، حیدر علی نے دو وکٹیں حاصل کیں۔

تاہم محمد حارث ایک رن بنا کر جنید صدیق کی گیند پر محمد جواد اللہ کے ہاتھوں کیچ آؤٹ ہوئے۔وکٹ کیپر بیٹر آؤٹ ہوتے ہی غصے میں آگئے اور اپنا بلا زمین پر مار کر توڑ دیا جس کی ویڈیو سوشل میڈیا پر زیر گردش ہے۔ویڈیو میں حارث کو بلا توڑتے ہوئے دیکھا جاسکتا ہے۔سوشل میڈیا صارفین کی جانب سے محمد حارث کے بیٹ توڑنے پر ملا جلا ردعمل آرہا ہے۔