سلمان آغا اگر ناکام ہوئے تو پاکستان مشکل میں آجائے گا‘رمیز راجہ

ٹاپ آرڈر نے اچھی شروعات کی لیکن کسی نے بڑی اننگز نہیں کھیلی، کوئی 15، 50 اور کوئی 10 پر آؤٹ ہوگیا،گفتگو

اتوار 31 اگست 2025 12:35

جہ(اُردو پوائنٹ اخبارتازہ ترین - این این آئی۔ 31 اگست2025ء) پاکستان کے سابق کپتان رمیز راجا نے سہ ملکی سیریز کے افتتاحی میچ میں افغانستان کے خلاف پاکستان کی جیت کا کریڈٹ کپتان سلمان علی آغا کو دیا اور بیٹنگ لائن پر تنقید بھی کردی۔پاکستان اور افغانستان کے میچ کے بعد اپنے یوٹیوب چینل پر رمیز راجا نے کہا کہ ایک مرحلے پر میچ افغانستان کی طرف سے جا رہا تھا اور اگر سلمان علی آغا رنز نہ بناتے تو پاکستان شدید مشکلات میں پڑ سکتا تھا۔

انہوں نے کہا کہ پاکستان نے اس پچ پر 182 رنز بنائے لیکن اس کے باوجود ایسا لگ رہا تھا کہ افغانستان کے پاس جیتنے کا موقع ہے اگر سلمان آغا ناکام ہوجاتے تو پاکستان کے لیے حالات بہت مشکل ہوسکتے تھے۔پاکستان کے مڈل آرڈر پر تنقید کرتے ہوئے راجہ نے کہا کہ کوئی بھی بلے باز کریز پر رک نہیں سکا۔

(جاری ہے)

سابق کپتان نے کہا کہ ٹاپ آرڈر نے اچھی شروعات کی لیکن کسی نے بڑی اننگز نہیں کھیلی، کوئی 15، 50 اور کوئی 10 پر آؤٹ ہوگیا، جب آپ افغانستان بیک فٹ پر تھا تو وکٹیں اتنی لاپرواہی سے کیوں گر رہی تھیں۔

راجہ نے اس بات پر زور دیا کہ پاکستانی بلے بازوں کو زیادہ ذمہ داری کے ساتھ بیٹنگ کرنے کی ضرورت ہے۔ان کا مزید کہنا تھا کہ ایسے حالات میں آپ کو ذہانت کے ساتھ بیٹنگ کرنی ہوگی، اور سلمان علی آغا نے بالکل ایسا ہی کیا، اگر وہ جلد آؤٹ ہو جاتے تو پاکستان 150 تک پہنچنے کے لیے جدوجہد کرتا، اور افغانستان میچ جیت لیتا۔