Live Updates

وزارتِ توانائی کی سیلاب سے متاثرہ علاقوں میں بجلی کی بحالی میں پیش رفت کے حوالے سے رپورٹ جاری

پیر 1 ستمبر 2025 12:40

اسلام آباد (اُردو پوائنٹ اخبارتازہ ترین - اے پی پی۔ 01 ستمبر2025ء) پاور ڈویژن نے سیلاب سے متاثرہ علاقوں میں بجلی کی بحالی کی پیشرفت پر یکم ستمبر تک کی رپورٹ جاری کردی،مجموعی طور پر 48 گرڈ اور 437 متاثرہ فیڈرز میں سے 169 کو مکمل اور 260 کو عارضی طور پر بحال کر دیا گیا ہے۔ ترجمان پاور ڈویژن کے مطابق پیسکو کے علاقے سوات، بونیر، شانگلہ، صوابی اور ڈی آئی خان کے 12 گرڈز اور 91 فیڈرز متاثر ہوئے جن میں سے 85 فیڈرز مکمل اور 6 کو جزوی طور پر بحال کر دیا گیا ہے۔

صوابی اور ڈی آئی خان میں بجلی بحالی کا کام مکمل کر لیا گیا ہے، سوات، بونیر، شانگلہ میں متاثرہ فیڈرز کی مکمل بحالی 2 سے 7 دن تک متوقع ہے۔ رپورٹ کے مطابق گیپکوکے 10 گرڈز اور 87 متاثرہ فیڈرز میں سے 80 فیڈرز مکمل اور 7 کو جزوی طور پر بحال کر دیا گیا ہے۔

(جاری ہے)

لیسکو میں لاہور، اوکاڑہ، شيخوپورہ، قصور اور ننکانہ کے 59 متاثرہ فیڈرز میں سے 57 کو جزوی طور پر بحال کر دیا گیا جبکہ مکمل بحالی 2 تا 5 ستمبر تک متوقع ہے۔

فیسکو کے زیرِ انتظام علاقوں ٹی ٹی سنگھ، فیصل آباد ، چنیوٹ، جھنگ، سرگودھا، میانوالی اور ڈی آئی خان کے 26 گرڈ اور 73 فیڈرز متاثر ہوئے۔ فیسکو کے متاثرہ فیڈرز میں سے 1 فیڈر مکمل اور 72 فیڈرکو عارضی طور پر بحال کر دیا گیا ہے۔ میپکو کے زیرِ انتظام علاقوں میں 114 متاثرہ فیڈرز کو عارضی طورپر بحال کردیا گیا ہے۔ میپکو کے زیرِ انتظام علاقوں میں پانی کم ہوتے ہی متاثرہ فیڈرز کی مکمل بحالی کا کام فوری شروع کر دیا جائے گا۔

ٹیسکو کے علاقے شمالی وزیرستان اور خیبر کے 10 فیڈرز متاثر ہوئے، ٹیسکو کا 1 فیڈر مکمل اور 4 فیڈر کو عارضی طور پر بحال کر دیا گیا ہے۔ ہیزیکو کے زیرِ انتظام علاقے مانسہرہ کے 3 متاثرہ فیڈر میں سے 2 مکمل طور پر بحال کر دئیے گئے ہیں۔ انہوں نے کہا کہ متاثرہ علاقوں میں بجلی کی فراہمی اولین ترجیح ہے، بجلی کی مکمل بحالی جلد از جلد مکمل کی جائے گی۔\932