اسرائیلی حملے میں یمن کے وزیراعظم اور11 وزرا کی موت کی تصدیق

پیر 1 ستمبر 2025 15:37

دبئی (اُردو پوائنٹ اخبارتازہ ترین - اے پی پی۔ 01 ستمبر2025ء) اسرائیلی حملے میں یمن کے وزیراعظم اور 11 وزرا کی موت کی تصدیق کر دی گئی ہے۔تاس نے یمن صبا نیوز ایجنسی کے حوالے سے رپورٹ کیا ہے کہ یمن کے حوثیوں کے زیر کنٹرول علاقے کو چلانے کے لیے تشکیل دی گئی حکومت کے 11 ارکان دارالحکومت صنعا میں اسرائیلی فضائی حملے میں مارے گئے ہیں۔ ان میں وزیر انصاف مجاہد احمد، وزیر اقتصادیات معین المہاکری، وزیر زراعت رضوان الرباعی ، وزیر خارجہ جمال عامر، وزیر توانائی علی حسن، وزیر ثقافت علی ال یافعی، وزیر محنت سمیر بجالہ، وزیر اطلاعات ہاشم شرف الدین ، وزیر کھیل محمد المولدشامل تھے۔

ان کے علاوہ اسرائیلی حملے میں مارے جانے والوں میں سینئر حکومتی عہدیدار محمدالکاسبی اور حکومتی سیکرٹری زاہد العمدی بھی شامل ہیں ۔

(جاری ہے)

یمن کے حوثی گروپ نے قبل ازیں ہفتے کے روز وزیر اعظم احمد غالب الرحاوی کی موت کی تصدیق کی تھی اور بتایا تھا کہ ان کی جگہ ان کے پہلے نائب محمد مفتاح نے وزیر اعظم کا عہدہ سنبھال لیا ہے۔ 28 اگست کو اسرائیلی فضائیہ کے لڑاکا طیارے نے حوثیوں کے زیر قبضہ یمنی دارالحکومت صنعا پر اس وقت حملہ کیا جب عبدالمالک الحوثی ٹیلی ویژن پر خطاب کر رہے تھے۔

اسرائیلی فوج کے مطابق حملے میں حوثیوں کی ایک فوجی تنصیب کو نشانہ بنایا گیا۔ اسرائیل کے این 12 ٹی وی چینل نے دعویٰ کیا تھا کہ حملے میں وزیر دفاع اور جنرل اسٹاف چیف سمیت انصار اللہ کے اعلیٰ ارکان کو نشانہ بنایا گیا تھا۔ نشریاتی ادارے کے مطابق اسرائیلی طیاروں نے اس تنصیب پر کم از کم10حملے کیے جہاں تحریک کے ارکان اپنے قائد کا خطاب دیکھنے کے لیے جمع تھے۔\932