ملک کے نامور اداکار انور علی انتقال کرگئے

پھیپھڑوں اور گردوں کے عارضے میں مبتلا ہونے کی وجہ سے ہسپتال میں زیر علاج تھے

ساجد علی پیر 1 ستمبر 2025 15:53

لاہور ( اُردو پوائنٹ اخبارتازہ ترین۔ 01 ستمبر 2025ء ) ملک کے نامور اداکار انور علی انتقال کر گئے۔ اطلاعات کے مطابق سٹیج، ٹی وی اور فلم کے نامور اداکار انور علی پھیپھڑوں اور گردوں کے عارضے میں مبتلا تھے، جو طویل علالت کے بعد خالق حقیقی سے جا ملے، ان کی عمر 65 برس تھی، ابابیل، ہوم سویٹ ہوم اور اندھیرا اجالا سمیت انور علی کے درجنوں ٹی وی ڈراموں نے عوام میں خاصی مقبولیت حاصل کی، تاہم کافی عرصہ پہلے انہوں نے شوبز کی دنیا کو خیرباد کہہ دیا تھا اور ان کا رجحان مکمل طور پر مذہب کی طرف ہوچکا تھا۔

(جاری ہے)

بتایا گیا ہے کہ معروف اداکار انور علی کی طبیعت شدید ناساز ہونے کے باعث چند روز قبل انہیں لاہور کے ایک نجی ہسپتال میں داخل کرایا گیا تھا، انہیں فالج اور دل کے مسائل بھی لاحق تھے جن کے باعث وہ گزشتہ کچھ مہینوں سے علیل تھے، تاہم انور علی کی حالت چند دنوں میں خراب ہوئی جس کے بعد انہیں فوری طور پر ہسپتال منتقل کیا گیا جہاں وہ آئی سی یو میں زیر علاج رہے جب کہ اداکار کے بیٹے نے بتایا کہ انور علی گزشتہ کئی ماہ سے مختلف طبی مسائل کا شکار تھے، تاہم حالیہ دنوں میں ان کی صحت کا بگڑنا اہل خانہ کے لیے تشویش کا باعث بنا۔