رات گئے ایک مرتبہ پھر زلزلے کے شدید جھٹکے

سوات ( اُردو پوائنٹ اخبارتازہ ترین۔ 02 ستمبر 2025ء ) رات گئے ایک مرتبہ پھر زلزلے کے شدید جھٹکے، خیبرپختونخواہ کے مختلف علاقوں میں زلزلے کے شدید جھٹکوں نے خوف و ہراس پھیلا دیا۔ تفصیلات کے مطابق سوات اور گردونواح میں آج تیسری دفعہ زلزلے کے جھٹکے محسوس کئے گئے۔ زلزلہ پیماہ مرکز کے مطابق زلزلے کی شدت 4.1 ریکارڈ کی گئی، مرکز کوہ ہندوکش کا پہاڑی سلسلہ تھا جبکہ اس کی زیر زمین گہرائی 236 کلومیٹر تھی۔

زلزلے کے جھٹکے خیبرپختونخوا کے ضلع پشاور، صوابی، ملاکنڈ اور مہمند شہر اور گردونواح میں بھی محسوس کئے گئے، شہریوں میں خوف و ہراس پھیل گیا اور لوگ گھروں سے باہر نکل آئے۔ تاحال کسی قسم کے جانی یا مالی نقصان کی کوئی اطلاع موصول نہیں ہوئی۔ اس سے قبل بھی منگل کے روز پشاور، مانسہرہ، مہمند، سوات، ایبٹ آباد اور اسلام آباد میں زلزلے کے جھٹکے محسوس کیے گئے، اس کے علاوہ مالاکنڈ، لنڈی کوتل، لوئر دیر اور اس کے مضافات میں بھی زلزلہ آیا، زلزلے کے باعث لوگوں میں خوف و ہراس پھیل گیا، عوام گھروں اور دفاتر سے باہر نکل آئے، حکام کی جانب سے بتایا گیا کہ زلزلے کی شدت 5.4 اور گہرائی 22 کلو میٹر ریکارڈ کی گئی جب کہ اس زلزلے کا مرکز جنوب مشرقی افغانستان تھا۔

(جاری ہے)

بتایا گیا کہ زمین کی تہہ تین بڑی پلیٹوں سے بنی ہوئی ہے، پہلی تہہ کا نام یوریشین، دوسری بھارتی اور تیسری اریبین ہے، زیر زمین حرارت جمع ہوتی ہے تو یہ پلیٹس سرکتی ہیں، زمین ہلتی ہے اور یہی کیفیت زلزلہ کہلاتی ہے، زلزلے کی لہریں دائرے کی شکل میں چاروں جانب یلغار کرتی ہیں، زلزلوں کا آنا یا آتش فشاں کا پھٹنا ان علاقوں ميں زیادہ ہے جو ان پلیٹوں کے سنگم پر واقع ہیں اور جن علاقوں میں ایک مرتبہ بڑا زلزلہ آ جائے تو وہاں دوبارہ بھی بڑا زلزلہ آ سکتا ہے۔

ماہرین کا کہنا ہے کہ پاکستان کا دو تہائی علاقہ فالٹ لائنز پر ہے جس کے باعث ان علاقوں میں کسی بھی وقت زلزلہ آسکتا ہے، کراچی سے اسلام آباد، کوئٹہ سے پشاور، مکران سے ایبٹ آباد اور گلگت سے چترال تک تمام شہر زلزلوں کی زد میں ہیں جن میں کشمیر اور گلگت بلتستان کے علاقے حساس ترین شمار ہوتے ہیں جب کہ دنیا بھر میں زلزلے کے اعتبار سے پاکستان دنیا کا پانچواں حساس ترین ملک ہے، پاکستان انڈین پلیٹ کی شمالی سرحد پر واقع ہے جہاں یہ یوریشین پلیٹ سے ملتی ہے، یوریشین پلیٹ کے دھنسنے اور انڈین پلیٹ کے آگے بڑھنے کا عمل لاکھوں سال سے جاری ہے، پاکستان کے دو تہائی رقبے کے نیچے سے گزرنے والی تمام فالٹ لائنز متحرک ہیں جہاں کم یا درمیانے درجہ کا زلزلہ آتا رہتا ہے۔