بھارتی پراکسی فتنہ الخوارج کا ایف سی ہیڈکوارٹرز بنوں پر حملہ، 5 دہشتگردوں کو ہلاک کردیا گیا

بھارتی اسپانسرڈ خوارج نے بارودی مواد سے بھری گاڑی دیوار حصار سے ٹکرائی، دہشتگردوں کے ساتھ شدید جھڑپ میں ایف سی اور پاک فوج کے 6جوان شہید ہوگئے۔ آئی ایس پی آر

ثنااللہ ناگرہ منگل 2 ستمبر 2025 23:20

بھارتی پراکسی فتنہ الخوارج کا ایف سی ہیڈکوارٹرز بنوں پر حملہ، 5 دہشتگردوں ..

راولپنڈی ( اردوپوائنٹ اخبار تازہ ترین۔ آئی پی اے ۔ 02 ستمبر 2025ء ) سکیورٹی فورسز نے ایف سی ہیڈکوارٹرز بنوں پر حملہ کرنے والے تمام 5 دہشتگردوں کو ہلاک کردیا ۔پاک فوج کے شعبہ تعلقات عامہ آئی ایس پی آر کے مطابق بھارتی پراکسی فتنہ الخوارج نے فیڈرل کانسٹیبلری ہیڈکوارٹرز بنوں پر حملہ کیا۔ بھارتی اسپانسرڈ خوارج نے جانب سے سکیورٹی حدود کو توڑنے کی کوشش کی ۔

سکیورٹی فورسز نے بھارتی پراکسی فتنہ الخوارج کے تمام پانچ دہشتگردوں کو ہلاک کردیا ۔ دہشتگردوں کے ساتھ شدید جھڑپ میں ایف سی اور پاک فوج کے 6جوان شہید ہوگئے۔ جوانوں نے بہادری اور پیشہ ورانہ مہارت کا مظاہرہ کرتے ہوئے خوارج کو نشانہ بنایا۔ بھارتی اسپانسرڈ خوارج نے بارودی مواد سے بھری گاڑی دیوار حصار سے ٹکرائی۔

(جاری ہے)

خود کش دھماکے کے نتیجے میں حصار کی دیوار کا کچھ حصہ گر گیا۔

دھماکے سے قریبی سول انفراسٹرکچر کو بھی نقصان پہنچاجس سے 3شہری زخمی ہوگئے۔ سکیورٹی فورسز کی جانب سے علاقے میں کلیئرنس آپریشن جاری ہے۔ آئی ایس پی آر کا کہنا ہے کہ اس بھیانک اور بزدلانہ عمل کے مجرمان کو منطقی انجام تک پہنچایا جائے گا۔ بھارتی اسپانسرڈ دہشتگردی کے خاتمے کیلئے سکیورٹی فورسز پرعزم ہیں۔بہادر سپاہیوں اور شہریوں کی قربانیاں ملکی دفاع کے عزم کو مضبوط کرتی ہیں۔