سٹیج، ٹی وی اور فلم کے نامور اداکار انور علی طویل علالت کے بعد انتقال کرگئے

پیر 1 ستمبر 2025 17:31

لاہور (اُردو پوائنٹ اخبارتازہ ترین - اے پی پی۔ 01 ستمبر2025ء) سٹیج ٹی وی اور فلم کے نامور اداکار انور علی انتقال کر گئے۔ اہل خانہ کے مطابق انور علی پھیپھڑوں اور گردوں کے عارضے میں مبتلا تھے، جو طویل علالت کے بعد خالق حقیقی سے جا ملے، ان کی عمر 65 برس تھی، ابابیل، ہوم سویٹ ہوم اور اندھیرا اجالا سمیت انور علی کے درجنوں ٹی وی ڈراموں نے عوام میں خاصی مقبولیت حاصل کی، تاہم کافی عرصہ پہلے انہوں نے شوبز کی دنیا کو خیرباد کہہ دیا تھا اور ان کا رجحان مکمل طور پر مذہب کی طرف ہوچکا تھا۔

(جاری ہے)

ان کے بیٹے نے بتایا کہ انور علی کی طبیعت شدید ناساز ہونے کے باعث چند روز قبل انہیں لاہور کے ایک نجی ہسپتال میں داخل کرایا گیا تھا، وہ فالج اور دل کے مسائل سمیت کئی ماہ سے مختلف طبی مسائل کا شکار تھے۔