سی ڈی سی اور عارف حبیب کے درمیان راست ایگریگیٹر پر معاہدہ

کراچی(اُردو پوائنٹ اخبارتازہ ترین - این این آئی۔ 02 ستمبر2025ء)سینٹرل ڈپازٹری کمپنی(سی ڈی سی)نے عارف حبیب لمیٹڈ کو اپنے راست ایگریگیٹر پلیٹ فارم میں شامل کرلیاہے جو سرمایہ کاروں کیلئے محفوظ، فوری اور باآسانی فنڈز کی منتقلی کے عمل میں ایک اہم پیش رفت ہے۔ کیٹالیسٹ آئی ٹی سلوشنز کے تعاون سے نافذ کیا گیا یہ اسٹریٹجک انضمام پاکستان کی کیپٹل مارکیٹ میں ڈیجیٹلائزیشن، شفافیت اور آپریشنل کارکردگی کو فروغ دینے کیلئے سی ڈی سی کے ویژن کو آگے بڑھانے کی عکاسی ہے۔

سی ڈی سی کے ہیڈ آفس میں منعقدہ تقریب میں معاہدے پر سی ڈی سی کے چیف ایگزیکٹو آفیسر بدیع الدین اکبر اور عارف حبیب لمیٹڈ کے چیف ایگزیکٹو آفیسر شاہدعلی حبیب نے دستخط کیے۔اس سسٹم کے تحت سی ڈی سی ہر سرمایہ کار کے ذیلی اکانٹ کیلئے انٹرنیشنل بینک اکائونٹ نمبر فارمیٹ میں ایک منفرد راست انوسٹمنٹ آئی ڈی جنریٹ کرتی ہے۔

(جاری ہے)

سرمایہ کار کے بینک اکانٹ میں بطور بینفشری رجسٹرڈ ہونے کے بعدفنڈز براہِ راست بروکر کے کلائنٹ اکانٹ میں ٹرانسفر کیے جاسکتے ہیں۔

یہ ٹرانزیکشنزرئیل ٹائم میں مکمل ہوتی ہیں اور چند منٹو ں میں فنڈز ٹریڈنگ کیلئے دستیاب ہوتے ہیں۔اس موقع پر سی ڈی سی کے چیف ایگزیکٹو آفیسر بدیع الدین اکبرنے کہاکہ عارف حبیب لمیٹڈ سیکیوریٹیزکی راست ایگریگیٹرمیں شمولیت سرمایہ کاروں کے فنڈز کی منتقلی میں ایک اہم سنگِ میل ہے۔ یہ پلیٹ فارم پاکستان کی کیپٹل مارکیٹ کی بڑھتی ہوئی ضروریات کو پورا کرتے ہوئے سیکیوریٹی کے ساتھ فوری اور بغیر کسی رکاوٹ کے ٹرانزیکشنز کی تکمیل کرتاہے۔

اس موقع پر عارف حبیب لمیٹڈ کے چیف ایگزیکٹو آفیسر شاہدعلی حبیب نے کہاکہ سی ڈی سی کے ساتھ شراکت داری پر ہمیں فخر ہے یہ شراکت داری جدت اور سرمایہ کاروں کو سہولت فراہم کرنے کی ہماری وابستگی سے ہم آہنگ ہے۔ راست کے ساتھ انضمام ہمار ے صارفین کو مزید سہولیات اور اعتمادفراہم کرے گا۔اس موقع پر عارف حبیب لمیٹڈ کی ٹیم کو سی ڈی سی کے آسان کنیکٹ پراڈکٹ کے بارے میں بریفنگ دی گئی جو کیپٹل مارکیٹ میں KYCکو آسان بنانے کیلئے ڈیزائن کیا گیاہے۔

اس موقع پردونوں اداروں نے مارکیٹ تک رسائی میں اضافے اور سرمایہ کاروں کو مزید سہولیات فراہم کرنے کیلئے مستقبل میں بھی مشترکہ طورپر کام کرنے کے عزم کا اعادہ کیا۔عارف حبیب لمیٹڈ کی شمولیت، سی ڈی سی بروکرز انضمام میں ایک اوراضافہ ہے جس کا مقصد سرمایہ کاروں کو سہولیات فراہم کرنااور ڈیجیٹل طورپر بااختیار بناناہے۔ یہ پلیٹ فارم پاکستان کی کیپٹل مارکیٹ کے ایکو سسٹم پر اعتماد بڑھانے کیلئے ڈیزائن کیا گیاہے۔ اب تک محمد منیرمحمد احمد خانانی سیکورٹیز،اے کے ڈی سیکیوریٹیز، چیس سیکیوریٹیز، ای کلیئر سروسز لمیٹڈ، زاہد لطیف خان سیکیوریٹیز اور اسٹینڈرڈ کیپٹل سیکیورٹیز راست ایگریگیٹرمیں شامل ہوچکے ہیں اور مزید بروکریج ہائوسزکا بھی جلد شامل ہونے کے توقع ہے۔