سیلاب و بارش سے متاثرہ شاہراہوں اور پلوں کی بحالی، صوبائی وزیر صہیب احمد بھرتھ کے دورے

لاہور (اُردو پوائنٹ اخبارتازہ ترین - این این آئی۔ 02 ستمبر2025ء) صوبائی وزیر تعمیرات و مواصلات ملک صہیب احمد بھرتھ نے لاہور، گوجرانوالہ اور وزیر آباد کا دورہ کیا۔ صوبائی وزیر نے سیلاب اور بارشی پانی سے انفراسٹرکچر کو ہونے والے نقصانات پر بریفنگ لی۔ ڈی سی لاہور، ڈی سی گوجرانوالہ، ڈی سی سیالکوٹ، ڈی سی حافظ آباد، ڈی سی منڈی بہا الدین اور ڈی سی وزیر آباد نے شاہراہوں و پلوں کی بحالی پر بریفنگ دی۔

لاہور میں سیلاب و بارشی پانی سے ہائی وے کی 2 شاہراہوں کے سیکشنز متاثر ہوئے۔ نارووال میں سیلاب و بارش کے باعث 110 متاثرہ شاہراہوں کے سیکشنز پر بحالی کا کام جاری ہے۔ سیالکوٹ میں 92 شاہراہوں کی بحالی کا کام تیزی سے جاری ہے۔ وزیر آباد اور حافظ آباد میں شاہراہوں کی بحالی کا عمل جاری ہے۔

(جاری ہے)

سیالکوٹ، حافظ آباد اور منڈی بہا الدین میں متاثر ہونے والے پلوں پر بحالی مکمل کر کے انہیں لائٹ ٹریفک کے لیے کھول دیا گیا ہے۔

سی اینڈ ڈبلیو کا عملہ فیلڈ میں موجود ہے۔ صوبائی وزیر تعمیرات و مواصلات ملک صہیب احمد بھرتھ اور صوبائی وزیر ٹرانسپورٹ بلال اکبر نے پرانا جی ٹی روڈ وزیر آباد اور بہرام رانا روڈ کا دورہ کیا اور جاری بحالی کے کاموں کا جائزہ لیا۔ سی اینڈ ڈبلیو کی ٹیم نے وزرا کو کام کی رفتار سے متعلق بریفنگ دی۔ ملک صہیب احمد بھرتھ نے کہا کہ وزیر اعلی پنجاب مریم نواز شریف کی قیادت میں سیلاب سے متاثرہ علاقوں میں بحالی کا کام مسلسل جاری ہے۔

مزید برآں صوبائی وزیر تعمیرات و مواصلات ملک صہیب احمد بھرتھ نے لاہور کے علاقوں مراکہ اور موہلنوال کا بھی دورہ کیا۔ صوبائی وزیر نے مراکہ اور خودپورہ میں شاہراہوں کو آنے والے نقصانات کا جائزہ لیا۔ محکمہ سی اینڈ ڈبلیو کے ہائی وے افسران نے صوبائی وزیر کو تفصیلی بریفنگ دی۔ مراکہ میں متاثرہ شاہراہ پر تعمیراتی کام کا آغاز کر دیا گیا ہے اور ہائی وے کی بھاری مشینری سے شاہراہ کی تعمیر تیزی سے جاری ہے۔

صوبائی وزیر ملک صہیب احمد بھرتھ نے کہا کہ ہائی وے کے افسران صوبہ بھر میں شاہراہوں اور پلوں کی بحالی میں مصروف ہیں رابطہ پلوں اور رابطہ سڑکوں کو جوڑا جا رہا ہے۔ انہوں نے مراکہ کی عوام سے بھی ملاقات کی اور کہا کہ سیلاب سے بچا اور متاثرہ علاقوں کی بحالی کے لیے ہر ممکن اقدامات کیے جا رہے ہیں۔ عوام الناس کے ساتھ مشکل کی اس گھڑی میں کھڑے ہیں اور پنجاب حکومت و انتظامیہ متاثرہ لوگوں کے پاس خود پہنچ رہی ہے۔