چین - پاکستان بچوں کے فن پاروں کی آرٹ نمائش شروع، امن و دوستی کا پیغام

بدھ 3 ستمبر 2025 17:10

اسلام آباد (اُردو پوائنٹ اخبارتازہ ترین - این این آئی۔ 03 ستمبر2025ء)چین اور پاکستان کے بچوں کے فن پاروں پر مشتمل مشترکہ نمائش کا آغاز پاکستان نیشنل کونسل آف دی آرٹس میں ہو گیا۔ یہ نمائش چین کی جاپانی جارحیت کے خلاف عوامی جنگ اور دوسری عالمی جنگ میں فاشزم پر فتح کی 80 ویں سالگرہ کی مناسبت سے منعقد کی گئی۔ چائنا اکنامک نیٹ کے مطابق آؤ مل کر یاد کریں اور امن کی تصویر بنائیں کے عنوان سے منعقدہ اس نمائش میں بچوں کے تیار کردہ 300 فن پارے شامل ہیں، جن میں پینٹنگز، خطاطی، کاغذی تراشے اور مصنوعی ذہانت سے تخلیق شدہ فن پارے بھی شامل ہیں۔

چین-پاکستان ایجوکیشنل اینڈ کلچرل انسٹی ٹیوٹ کے زیر اہتمام یہ نمائش پانچ روز تک جاری رہے گی، جس کے بعد اسے پنجاب یونیورسٹی لے جایا جائے گا تاکہ وسیع تر عوام تک رسائی حاصل کی جا سکے۔

(جاری ہے)

چائنا اکنامک نیٹ کے مطابق پاکستان کے وفاقی وزیر برائے قومی ورثہ و ثقافت اورنگزیب خان کھچی نے اس نمائش کی تاریخی اہمیت پر زور دیا۔ انہوں نے کہا کہ یہ تقریب اٴْن عظیم قربانیوں کو یاد کرنے کا موقع ہے جو امن، آزادی اور انسانی وقار کے لیے دی گئیں۔

انہوں نے کہااس مقابلے کے ذریعے ہم نئی نسل کو امن، دوستی اور اتحاد جیسے اہم موضوعات سے روشناس کرا رہے ہیں۔ چائنا اکنامک نیٹ کے مطابق پاکستان میں چینی سفارتخانے کے ناظم الامور شی یوان چیانگ نے دونوں ممالک کے درمیان تاریخی تعلقات کو اجاگر کیا۔ ان کا کہنا تھاکہچین اور پاکستان نے فاشزم کے خلاف جنگ میں شانہ بشانہ کھڑے ہو کر عالمی امن میں اہم کردار ادا کیا۔

آج کے دور میں بھی ضروری ہے کہ دونوں ممالک یکجہتی سے کام لیتے ہوئے ایک مشترکہ مستقبل کی تعمیر میں حصہ لیں۔ چائنا اکنامک نیٹ کے مطابق نمائش میں امن کے علامتی عناصر جیسے کبوتروں، زیتون کی شاخوں، اور چین و پاکستانی بچوں کو ہاتھوں میں ہاتھ ڈالے دکھایا گیا۔ تقریب میں تقریباً 200 مہمانوں نے شرکت کی، جن میں پاکستان کی پارلیمانی سیکریٹری برائے وفاقی تعلیم و پیشہ ورانہ تربیت فرح ناز اکبر، قومی اسمبلی کی رکن ڈاکٹر شازیہ صوبیہ، اساتذہ، اور دونوں ممالک کے بچے شامل تھے۔