چیئرمین سینیٹ سید یوسف رضا گیلانی کی طرف سے ہزاره جرنلسٹ یونین راولپنڈی/اسلام آباد (ریذورٹ) کے نومنتخب عہدیداران کو مبارکباد

بدھ 3 ستمبر 2025 19:00

اسلام آباد (اُردو پوائنٹ اخبارتازہ ترین - اے پی پی۔ 03 ستمبر2025ء) چیئرمین سینیٹ سید یوسف رضا گیلانی نے ہزاره جرنلسٹ یونین راولپنڈی/اسلام آباد (ریذورٹ) کے نومنتخب صدر تیمور اقبال جدون اور ان کی پوری کابینہ کو کامیابی پر دلی مبارکباد پیش کی ہے۔بدھ کو سینیٹ سیکرٹریٹ سے جاری کردہ بیان کے مطابق چیئرمین سینیٹ نے اپنے تہنیتی پیغام میں کہا کہ صحافت ایک معزز اور ذمہ دارانہ پیشہ ہے جو جمہوریت کی بنیادوں کو مضبوط بنانے، عوامی مسائل کو اجاگر کرنے اور سماج میں شفافیت کو فروغ دینے میں کلیدی کردار ادا کرتا ہے۔

انہوں نے کہا کہ ہزاره جرنلسٹ یونین کی نومنتخب قیادت کی کامیابی نہ صرف صحافی برادری کے اعتماد کی عکاس ہے بلکہ اس سے صحافت کے شعبے میں نئے ولولے اور مثبت سوچ کو تقویت ملے گی۔

(جاری ہے)

انہوں نے امید ظاہر کی کہ نومنتخب کابینہ صحافیوں کی فلاح و بہبود، ان کے مسائل کے حل اور آزادی اظہار کے فروغ کے لیے اپنی تمام صلاحیتوں کو بروئے کار لائے گی۔ چیئرمین سینیٹ نے مزید کہا کہ صحافی برادری ریاستی اداروں اور عوام کے درمیان ایک اہم پل کی حیثیت رکھتی ہے اور معاشرے میں مثبت رویوں کے فروغ کے ساتھ ساتھ قومی ترقی میں بھی ان کا کردار ناقابل فراموش ہے۔

چیئرمین سینیٹ نے اس عزم کا اعادہ کیا کہ پارلیمان ہمیشہ آزادی صحافت اور صحافی برادری کے جائز مطالبات کی حمایت کرتا آیا ہے اور آئندہ بھی کرتا رہے گا۔ انہوں نے کہا کہ پارلیمان اور میڈیا کے مابین مضبوط تعلقات ہی شفافیت، احتساب اور جمہوریت کی کامیابی کے ضامن ہیں۔چیئرمین سینیٹ نے نومنتخب صدر تیمور اقبال جدون اور ان کی پوری ٹیم کے لیے نیک خواہشات کا اظہار کرتے ہوئے کہا کہ وہ اپنی محنت، تجربے اور وژن کے ذریعے صحافی برادری کے اعتماد پر پورا اتریں گے اور صحافت کے اعلیٰ اصولوں کے فروغ میں اہم کردار ادا کریں گے۔