سپریم کورٹ کے ججز خطوط لکھ رہے ہیں کہ عدلیہ آزاد نہیں، مصطفی نواز کھوکر

ویں ترمیم کے بعد عدلیہ کو ایگزیکٹو کا ایک ذیلی ادارہ بنا کر رکھ دیا گیا ہے، ججز کے فیصلے کو غیر رسمی مشاورت سے مسترد نہیں کیا جا سکتا، میڈیا سے گفتگو

جمعرات 4 ستمبر 2025 17:21

اسلام آباد (اُردو پوائنٹ اخبارتازہ ترین - این این آئی۔ 04 ستمبر2025ء)اپوزیشن اتحاد تحریک تحفظ آئین پاکستان کے رہنمامصطفی نواز کھوکھر نے کہا ہے کہ سپریم کورٹ کے ججز خطوط لکھ رہے ہیں کہ عدلیہ آزاد نہیں۔سپریم کورٹ کے باہر میڈیا سے گفتگو کرتے ہوئے مصطفی نواز کھوکھر نے کہا کہ جسٹس منصور علی شاہ اور جسٹس منیب کے فیصلے پر عمل کیا جائے۔انہوںنے کہاکہ جس ادارے کے باہر ہم پریس کانفرنس کر رہے ہیں یہ انصاف دینے والا سب سے بڑا ادارہ ہے، آج اسی ادارے کے ججز خطوط لکھ رہے ہیں کہ عدلیہ آزاد نہیں۔

انہوں نے کہا کہ ملک میں سیاسی جماعتوں کو نشانہ بنایا جا رہا ہے، سیاستدانوں کے خلاف ناانصافیوں میں ججز کا کردار رہا۔انہوںنے کہاکہ 26ویں ترمیم کے بعد عدلیہ کو ایگزیکٹو کا ایک ذیلی ادارہ بنا کر رکھ دیا گیا ہے، ججز کے فیصلے کو غیر رسمی مشاورت سے مسترد نہیں کیا جا سکتا۔

(جاری ہے)

مصطفی نواز کھوکھر نے کہا ہے کہ آئینی بینچ 26ویں ترمیم کے کیسز سننے کا اہل نہیں، 2 ججز کے خط کے بعد اب 26ویں آئینی ترمیم کے خلاف جتنی درخواستیں آئی ہیں وہ سپریم کورٹ کے تمام ججز سنیں۔

انہوںنے کہاکہ میں 26ویں ترمیم کے خلاف درخواست گزار ہوں، اس سے میرے حقوق مجروح ہوئے ہیں۔ آئینی بینچ اس کیس کو سننے کا اہل نہیں۔انہوں نے کہا کہ اختر مینگل، فہمیدہ مرزا اور محسن داوڑ کے ساتھ درخواست کا فریق ہوں۔ آج اپنا مؤقف سامنے رکھا کہ ججز کمیٹی کا مؤقف سامنے آ چکا۔مصطفی نواز کھوکھر نے کہا کہ ایک پریکٹس اینڈ پروسیجر کمیٹی بنائی گئی جس میں 2 ججز نے خط لکھا، کمیٹی نے فیصلہ کیا اور اس کمیٹی میں چیف جسٹس یحییٰ آفریدی اقلیت میں تھے۔