جدہ میں پبلک بس سروس کے روٹس گوگل میپ سے لنک کر دیا گیا

جمعہ 5 ستمبر 2025 10:10

ریاض (اُردو پوائنٹ اخبارتازہ ترین - اے پی پی۔ 05 ستمبر2025ء) جدہ ٹرانسپورٹ کمپنی نے پبلک بس سروس کے روٹس کو گوگل میپ پر جاری کر دیا ہے۔ اردو نیوز کے مطابق جدہ ٹرانسپورٹ کمپنی کے سی ای او انجینئریوسف الصائغ نے کہا ہے کہ مسافروں کی سہولت کے لئے روٹس کو گوگل میپ سے لنک کیا گیا ہے۔ انہوں نے کہا کہ گوگل میپ پر بسوں کے روٹ کو لنک کرنے سے نہ صرف مسافروں کو تمام راستوں اور سٹیشنز کے بارے میں معلومات حاصل ہوں گی بلکہ اس کے ذریعے بسوں کی آمد ورفت کا شیڈول بھی جان سکیں گے۔

انہوں نے کہا کہ مملکت کے وژن 2030 کے اہداف کے مطابق ترقیاتی امور پرتیزی سے کام جاری ہے جس کے تحت شہریوں کے معیار زندگی کو بلند کرنے کے لئے جدید ٹیکنالوجی کو متعارف کرانا ہے۔ جدہ بس روٹ کے لئے گوگل میپ کے ذریعے بسوں کے آئکون کا انتخاب کر کے اپنے مطلوبہ منزل کی نشاندہی کی جاتی ہے جس کے بعد اس روٹ پر بس کے بارے میں تمام تفصیلات سامنے آجاتی ہیں۔

(جاری ہے)

یاد رہے کہ پبلک ٹرانسپورٹ سروسز کمپنی نے جدہ شہر کے شمالی علاقے کے لئے ایک نیا روٹ شروع کرنے کا اعلان کیا ہے۔ نیا روٹ شمالی حصے کو کنگ عبداللہ سپورٹس سٹی، الجوہرہ اور دیگر علاقوں سےملاتا ہے۔ یہ اقدام جدہ میں ٹرانسپورٹیشن نیٹ ورک کو وسیع کرنے اور معیار زندگی کو بہتر بنانے کی کوششوں کا حصہ ہے۔