فیس بک نے اپنے پرانے فیچر پوک کو نئے انداز میں متعارف کرا دیا

صارفین اپنے دوستوں کے ساتھ پوکے اکائونٹ دیکھ سکتے ہیں،انتظامیہ

جمعہ 5 ستمبر 2025 16:35

نیویارک(اُردو پوائنٹ اخبارتازہ ترین - این این آئی۔ 05 ستمبر2025ء)فیس بک نے اپنے پرانے فیچر پوک نوجوان صارفین کی دلچسپی کو مدِنظر رکھتے ہوئے نئے انداز میں متعارف کرایا ہے۔میٹا کے مطابق اب فیس بک پروفائلز پر ایک نیا بٹن موجود ہوگا، جس کے ذریعے صارفین اپنے دوستوں کو براہِ راست ان کی پروفائل سے پوک بھیج سکتے ہیں، جو فوری نوٹیفکیشن کی صورت میں موصول ہوگا۔

(جاری ہے)

کمپنی کے مطابق نیا پوکے پیج بھی متعارف کرایا گیا ہے، جس سے صارفین اپنے دوستوں کے ساتھ پوکے اکائونٹ دیکھ سکتے ہیں، پوکس کی ہسٹری چیک کر سکتے ہیں اور ناپسندیدہ پوکس کو خارج بھی کر سکتے ہیں۔میٹا نے اس فیچر کو مزید دلچسپ بنانے کے لیے پوک کانٹ کے ساتھ خصوصی آئیکونز شامل کئے ہیں، جیسے ہی صارفین اپنے دوستوں کے ساتھ پوک کائونٹ بڑھائیں گے تو ان کے نام کے ساتھ مختلف آئیکونز جیسے فائر ایموجی یا 100 ظاہر ہوں گے، یہ طریقہ کار بالکل اسنیپ چیٹ اور ٹک ٹاک کے اسٹریک سسٹم جیسا ہے، جو نوجوانوں کو ایپ پر طویل وقت تک مصروف رکھنے کا باعث بنتا ہے۔

ماہرین کا کہنا تھا کہ فیس بک کی یہ حکمتِ عملی نوجوان صارفین کو دوبارہ اپنی ایپ کی جانب واپس لانا ہے، کیونکہ امریکا سمیت کئی ممالک میں نوجوانوں کی تعداد فیس بک پر تیزی سے کم ہو رہی ہے۔