آل پارٹیز کی شٹرڈاؤن ہڑتال کی حمایت، 8 ستمبر کو کاروبار بند رہیں گے، مرکزی تنظیم تاجران بلوچستان

جمعہ 5 ستمبر 2025 19:00

کوئٹہ (اُردو پوائنٹ اخبارتازہ ترین - این این آئی۔ 05 ستمبر2025ء) مرکزی تنظیم تاجران بلوچستان کے ترجمان کاشف حیدری نے کہا ہے کہ آل پارٹیز کے اعلان کردہ شٹرڈاؤن ہڑتال کی بھرپور حمایت کی جاتی ہے اور صوبے بھر کے تاجر 8 ستمبر بروز سوموار کو اپنے کاروبار بند رکھ کر بدامنی کے خلاف آواز بلند کریں۔ یہ بات انہوں نے اپنے جاری کردہ بیان میں کہیں۔ انہوں نے کہا کہ 2 ستمبر کو شاہوانی سٹیڈیم سریاب روڈ پر راہشون سردار عطائ اللہ خان مینگل کی برسی کے بعد جلسہ گاہ کے باہر ایک دہشت گردانہ خودکش حملہ ہوا جس کے نتیجے میں 17 سے زائد قیمتی جانیں ضائع ہوئیں جبکہ 40 سے زیادہ معصوم لوگ زخمی ہوئے۔

اس سفاکانہ واقعے کی جتنی مذمت کی جائے کم ہے۔ مرکزی تنظیم تاجران بلوچستان نہ صرف شہدائ کے لواحقین کے دکھ میں برابر کی شریک ہے بلکہ زخمیوں کی جلد صحت یابی کے لئے دعا گو بھی ہے۔

(جاری ہے)

کاشف حیدری نے کہا کہ آئے روز کے بدامنی کے واقعات نے عوام کو خوف و ہراس میں مبتلا کر دیا ہے، کاروباری سرگرمیوں کو ناقابل تلافی نقصان پہنچ رہا ہے اور تاجر برادری شدید پریشانی میں مبتلا ہے۔

ایسے حالات میں آل پارٹیز کی طرف سے دی گئی شٹرڈاؤن ہڑتال کا فیصلہ بروقت اور عوامی احساسات کا ترجمان ہے۔ انہوں نے کہا کہ تاجروں کی یہ جدوجہد کسی ذاتی مفاد کے لئے نہیں بلکہ صوبے میں امن و سکون کے قیام اور عوامی جان و مال کے تحفظ کے لئے ہے۔ ہم سمجھتے ہیں کہ پرامن احتجاج کے ذریعے ہی حکمرانوں اور قانون نافذ کرنے والے اداروں کو یہ واضح پیغام دیا جا سکتا ہے کہ عوام اور تاجر مزید بدامنی برداشت کرنے کے لئے تیار نہیں۔

کاشف حیدری نے کہا کہ تاجر ہمیشہ امن کے داعی رہے ہیں اور آئندہ بھی اپنی صفوں میں اتحاد قائم رکھ کر ہر مشکل گھڑی میں عوام کے شانہ بشانہ کھڑے رہیں گے۔ انہوں نے تاجروں سے پرزور اپیل کی کہ 8 ستمبر کو ہڑتال کو کامیاب بنائیں اور بھرپور اتحاد و یکجہتی کا مظاہرہ کریں تاکہ یہ اجتماعی آواز حکمرانوں کے ایوانوں تک پہنچ سکے۔