آصفہ بھٹو نے سروائیکل کینسر سے بچا ئوکی ویکسین کی مہم کو سنگ میل قرار دیدیا

پیر 15 ستمبر 2025 13:31

کراچی(اُردو پوائنٹ اخبارتازہ ترین - این این آئی۔ 15 ستمبر2025ء)خاتون اول آصفہ بھٹو زرداری نے سروائیکل کینسر سے بچا ئوکی ویکسین کی مہم کو سنگ میل قرار دے دیا۔ایک بیان میں انہوں نے کہا کہ ہم پہلی مرتبہ لڑکیوں کو ایچ پی وی وائرس سے بچا ئوکی ویکسین لگانے کی قومی مہم کا آغاز کر رہے ہیں۔آصفہ بھٹو نے کہاکہ سروائیکل کینسر وہ واحد کینسر ہے جس سے ویکسین کے ذریعے بچائو ممکن ہے، والدین یقینی بنائیں کہ ان کی 9 سے 14 سال کی بیٹیوں کو سروائیکل کینسر کی ویکسین ضرور لگے۔

(جاری ہے)

انہوں نے یہ بھی کہا کہ آئیے مل کر اپنی بیٹیوں کے لیے ایک صحت مند مستقبل یقینی بنائیں۔دوسری جانب لڑکیوں میں ہیومن پیپلوما وائرس سے ہونے والے سروائیکل کینسر سے بچائو کی ویکسینیشن مہم کا آغاز ہو گیا۔خاتونِ پاکستان گرلز اسکول میں انسداد ایچ پی وی مہم کا افتتاح وزیر صحت سندھ عذرا پیچوہو نے کیا۔تقریب میں وزارتِ صحت، ڈبلیو ایچ او، عالمی این جی او اور یونیسف سمیت دیگر اداروں کے نمائندوں نے شرکت کی۔محکمہ صحت سندھ کی جانب سے کہا گیا ہے کہ 9 سے 14 سال کی بچیوں کو انسداد ایچ پی وی کی ویکسین مفت فراہم کی جائے گی، ایچ پی وی ویکسین تمام سرکاری اسکولوں و صحت مراکز پر دستیاب ہو گی۔