جمہوریت عوام کی آواز اور قوم کی طاقت ہے‘ بلاول بھٹو زرداری

جمہوریت طرزِ حکمرانی نہیں بلکہ عوام اور ان کے نمائندوں کے درمیان ایک عہد ہے جو انصاف، مساوات، آزادی کی ضمانت دیتا ہے،پیغام

پیر 15 ستمبر 2025 14:04

جمہوریت عوام کی آواز اور قوم کی طاقت ہے‘ بلاول بھٹو زرداری

اسلام آباد(اُردو پوائنٹ اخبارتازہ ترین - این این آئی۔ 15 ستمبر2025ء) پاکستان پیپلز پارٹی کے چیئرمین بلاول بھٹو زرداری نے کہا ہے کہ جمہوریت محض طرزِ حکمرانی نہیں بلکہ عوام اور ان کے نمائندوں کے درمیان ایک عہد ہے جو انصاف، مساوات، آزادی اور وقار کی ضمانت دیتا ہے، جمہوریت عوام کی آواز اور قوم کی طاقت ہے۔جمہوریت کے عالمی دن کے موقع پر اپنے پیغام میں بلاول بھٹو زرداری نے کہا ہے کہ جمہوریت ہماری قومی شناخت کی روح اور ترقی کی بنیاد ہے، یہ شہریوں کو سیاسی عمل میں شریک کرتی ہے، سیاسی تنوع کو فروغ دیتی ہے اور سب کے لیے یکساں حقوق کے تحفظ کی ضامن ہے۔

انہوں نے کہا ہے کہ پاکستان کا جمہوری سفر بے شمار شہداء کی قربانیوں سے عبارت ہے جن میں قائدِ عوام شہید ذوالفقار علی بھٹو اور شہید محترمہ بینظیر بھٹو سرفہرست ہیں، دونوں رہنماؤں نے عوام کے حقِ حاکمیت کے تحفظ کے لیے اپنی جانیں قربان کیں۔

(جاری ہے)

پی پی چیئرمین نے کہا ہے کہ صدر آصف علی زرداری کی قیادت میں پیپلز پارٹی کی سابقہ حکومت نے اٹھارویں آئینی ترمیم منظور کر کے 1973 کے آئین کی روح کے مطابق پارلیمان کو مضبوط بنایا، جو جمہوریت کی بڑی فتح ہے۔

انہوں نے زور دیا ہے کہ جمہوریت کا تحفظ ایک مقدس فریضہ ہے اور اس پر کسی قسم کا سمجھوتہ دراصل مستقبل پر سمجھوتہ ہے، پاکستانی نوجوان جمہوری اقدار کے خلاف ہر خطرے کا مقابلہ کرنے کے لیے چوکس رہیں اور ایک جامع، منصفانہ اور خوشحال پاکستان کی تعمیر میں اپنا کردار ادا کریں۔بلاول بھٹو زرداری نے کہا ہے کہ پیپلز پارٹی جمہوریت کے استحکام کے لیے غیر متزلزل عزم کے ساتھ میدانِ عمل میں موجود ہے، قائداعظم، بانی رہنماؤں کے وژن اور عوام کی امنگوں کے مطابق پارٹی اپنی جدوجہد جاری رکھے گی۔انہوں نے مزید کہا ہے کہ ہمارے جمہوری ہیروز کی قربانیاں کبھی فراموش نہیں کی جائیں گی، ان کا حوصلہ اور ورثہ ہمیں یاد دلاتا ہے کہ پاکستان کی اصل طاقت عوام کی قوت میں ہے۔