Live Updates

صوبائی وزیر تعلیم کا مختلف اضلاع کے فلڈ ریلیف کیمپوں کا دورہ، سہولیات کے معیار کا جائزہ لیا

جمعہ 5 ستمبر 2025 20:40

لاہور (اُردو پوائنٹ اخبارتازہ ترین - اے پی پی۔ 05 ستمبر2025ء) وزیر تعلیم پنجاب رانا سکندر حیات نے مختلف اضلاع کے فلڈ ریلیف کیمپوں کا دورہ کیا اور سہولیات کے معیار کا جائزہ لیا۔ مختلف فلڈ ریلیف کیمپوں میں سیلاب متاثرین سے گفتگو کرتے ہوئے وزیر تعلیم نے یقین دلایا کہ سیلاب سے متاثرہ گھر جلد آباد اور سکول بحال ہوں گے اور خوشیاں لوٹیں گی۔ انہوں نے کہا کہ مشکل وقت کا ملکر مقابلہ کریں گے اور موجودہ صورتحال سے باہر نکلیں گے۔

اس موقع پر بعض متاثرین کی جانب سے ضروریات کی کچھ چیزیں نہ ہونے کی شکایت پر فوری نوٹس لیتے ہوئے انتظامیہ کو آج ہی سہولیات کی فراہمی کی ہدایت کی اور کہا کہ متاثرین کو سہولیات کی فراہمی کے حوالے سے وزیر اعلی پنجاب کی سخت ہدایات ہیں۔ انتظامیہ تمام کیمپوں اور خیموں میں خدمات کی دستیابی یقینی بنائے اور ذاتی طور پر صورتحال کو مانیٹر کرے۔

(جاری ہے)

وزیر تعلیم نے فلڈ ریلیف کیمپوں میں کھانے کا معیار چیک کرنے کے ساتھ ساتھ طبی اور دیگر سہولیات کا بھی جائزہ لیا۔ رانا سکندر حیات نے خیمہ سکولوں کا بھی دورہ کیا جہاں وہ بچوں میں گھل مل گئے اور ان میں کھلونے اور دیگر تحائف تقسیم کئے۔ وزیر تعلیم نے متاثرین کو بچوں کو خیمہ سکول بھیجنے کی بھی ہدایت کی اور کہا کہ بچوں کو وقت کے ضیاع سے بچانے کیلئے خیمہ سکولوں میں لازمی بھیجا جائے۔

متاثرین کی دلجوئی کرتے ہوئے وزیر تعلیم نے انہیں یقین دلایا کہ اسمبلی فلور پر کسانوں اور زمینداروں کے حق میں آواز اٹھائیں گے، متاثرہ کسانوں اور زمینداروں کے نقصان کا تخمینہ لگا رہے، جتنا ممکن ہوسکا انہیں ریلیف دلوانے کی کوشش کریں گے۔ انہوں نے کہا کہ وزیر اعلی پنجاب متاثرین کیلئے جامع پیکج لا رہی ہیں جس میں کسانوں اور زمینداروں کو ریلیف کے حوالے سے اچھی خبر شامل ہوگی۔ رانا سکندر حیات نے کہا کہ مریم نواز سیلاب متاثرین کیلئے متحرک ہیں اور ان کے نقصان کے ازالے اور بحالی کیلئے ساتھ کھڑی ہیں۔