وزیراعلی پنجاب کا جلالپور جٹاں کے نواحی علاقے شہباز پور فلڈ ریلیف ٹینٹ سٹی کا دورہ،کھانا، ادویات، صفائی اور دیگر سہولیات بارے دریافت کیا

لاہور (اُردو پوائنٹ اخبارتازہ ترین - اے پی پی۔ 05 ستمبر2025ء) وزیراعلی پنجاب مریم نواز جلالپور جٹاں کے نواحی علاقے شہباز پور فلڈ ریلیف ٹینٹ سٹی پہنچ گئیں۔وزیراعلی نے ٹینٹ سٹی میں سیلاب متاثرہ خاندانوں سے ملاقات کی، خواتین اور بچوں کو تحائف پیش کیے۔وزیراعلی نے ٹینٹ کے اندر بیٹھ کر ننھی بچی اور اس کی والدہ سے بات چیت کی اور کمسن بچی نے وزیراعلی کو دیکھ کراظہار مسرت کیا۔

انہوں نے ننھی بچی کو پیار کیا اور تحائف پیش کیے۔وزیراعلی پنجاب نے ٹینٹ سٹی میں کھانا، ادویات، صفائی اور دیگر سہولیات کے بارے میں دریافت کیا۔ذیابیطس کی بزرگ خاتون مریضہ کو شوگر چیک اپ کیلئے خود فیلڈ ہسپتال لیکر کر گئیں، مریضہ کو انسولین، گلوکو میٹر اور دیگر ضروری اشیا فراہم کرنے کی ہدایت کی۔

(جاری ہے)

وزیراعلی نے سیلاب سے گھرمسمار ہونے پر آبدیدہ نوجوان کو تسلی دی، گھر بنانے میں پوری معاونت کی یقین دہانی کی۔

انہوں نے معمر شخص کو بھینس سیلاب میں بہہ جانے پر بھی دلاسہ دیااور نقصان پورا کرنے کا یقین دلایا۔ ٹینٹ سٹی میں متاثرہ خاندانوں سے بات چیت کرتے ہوئے انہوں نے کہا کہ سروے شروع ہورہا ہے،نقصانات کا ازالہ کریں گے اورگھر بھی بنا کر دیں گے۔ انہوں نے انتظامیہ کو ہدایت کی کہ سیلاب متاثرین کوپینے کا صاف پانی، کھانا اور مویشیوں کو چارہ ، لوگ جہاں جہاں بیٹھے ہیں وہاں ٹینٹ لگا کر دیئے جائیں۔

تھرمل امیجنگ ٹیکنالوجی کے استعمال سے جانیں بچانے پر خوشی ہے، عوام کی خدمت کا جذبہ قابل تحسین ہے۔ وزیراعلی نے سیلاب متاثرین سے گفتگوکرتے ہوئے کہا کہ فکر نہیں کرنی میں آپ کے ساتھ ہوں۔وزیراعلی مریم نوازنے شہباز پور پل کا بھی دورہ کیا۔ انہوں نے ''کلینک آن بوٹس'' کا بھی معائنہ کیا۔ انہوں نے سرویلنس پر ریسکیو فیلڈ ٹیموں کو مبارکباد دی اور ان کی خدمات کو سراہا اور ریسکیو اہلکاروں کو انعام دینے کے اعلان بھی اعادہ کیا۔

انہوں نے دریامیں ریسکیو بوٹس کے سکواڈ کو سراہا اور شاباش دی اور سیف سٹی تھرمل امیجنگ ڈرون کا بھی معائنہ کیا۔ اس موقع پر انہیں بتایا گیا کہ ضلع گجرات میں 24 تھرمل امیجنگ ڈرون سیلابی علاقے میں ڈیجیٹل سرویلنس کررہے ہیں۔ڈیجیٹل تھرمل امیجنگ کی مدد سے سیلابی ریلوں میں پھنسے ہوئے 55 لوگوں اور57 مویشیوں کو بحفاظت ریسکیو کیا گیا۔