Live Updates

سیکرٹری آبپاشی پنجاب اور سپیشل سیکرٹری جنوبی پنجاب کا ملتان زون کے فلڈ بندوں کا دورہ

ہفتہ 6 ستمبر 2025 17:30

احمدپورشرقیہ (اُردو پوائنٹ اخبارتازہ ترین - اے پی پی۔ 06 ستمبر2025ء) سیکرٹری آبپاشی پنجاب اور سپیشل سیکرٹری جنوبی پنجاب نے ملتان زون کے فلڈ بندوں کا دورہ کیا۔سیلاب کی موجودہ اور ممکنہ صورتحال کے پیش نظر، سیکرٹری آبپاشی پنجاب (لاہور) واصف خورشید اور سپیشل سیکرٹری آبپاشی جنوبی پنجاب کنور اعجاز خالق رزاقی نے آبپاشی زون ملتان کے اہم فلڈ بندوں کا تفصیلی دورہ کیا۔

دورے کا مقصد حالیہ سیلابی صورتحال کا جائزہ لینا، حفاظتی انتظامات کا معائنہ کرنا اور کسی بھی ہنگامی حالت سے نمٹنے کے لیے محکمے کی تیاری کو یقینی بنانا تھا۔دورے کے دوران وفد نے چناب فلڈ بند، فاضل شاہ فلڈ بند، نواب پور فلڈ بند، اکبر فلڈ بند، ہیڈ محمد والا، شیر شاہ فلڈ بند اور جلال پور خاکی فلڈ بند سمیت دیگر اہم مقامات کا معائنہ کیا۔

(جاری ہے)

حکام نے حفاظتی اقدامات، مشینری کی موجودگی اور فیلڈ اسٹاف کی تعیناتی کا تفصیلی جائزہ لیا۔سپیشل سیکرٹری کنور اعجاز خالق رزاقی نے موقع پر موجود افسران سے گفتگو کرتے ہوئے کہا کہ محکمہ آبپاشی کی اولین ترجیح ہے کہ ہیڈ محمد والا برج، اکبر فلڈ بند اور شیر شاہ فلڈ بند جیسے حساس مقامات پر پانی کے بہاؤ کو محفوظ طریقے سے گزارا جائے۔ انہوں نے واضح کیا کہ یہ وقت مکمل چوکس رہنے کا ہے اور کسی قسم کی کوتاہی برداشت نہیں کی جائے گی۔\378