گورنر سندھ کامران خان ٹیسوری سے ائیر مارشل عامر شہزاد کی الوداعی ملاقات

ہفتہ 6 ستمبر 2025 19:00

کراچی (اُردو پوائنٹ اخبارتازہ ترین - اے پی پی۔ 06 ستمبر2025ء) گورنر سندھ کامران خان ٹیسوری سے ائیرافسر کمانڈنگ سائوتھرن ائیر مارشل عامر شہزاد نے الوداعی ملاقات کی۔ہفتہ کو گورنر ہائوس سے جاری اعلامیہ کے مطابق اس موقع پر گورنر سندھ نے ائیر مارشل عامر شہزاد کو ان کی ترقی پر مبارکباد دی اور مستقبل کے لیے نیک خواہشات کا اظہار کیا۔ ملاقات میں نئے تعینات ہونے والے ائیر وائس مارشل اختر عمران سیدوزئی بھی شریک تھے۔

(جاری ہے)

گورنر سندھ کامران خان ٹیسوری نے پاک فضائیہ کے شاہینوں کی پیشہ ورانہ مہارت، جرات اور قومی خدمات کو سراہتے ہوئے کہا کہ فضائیہ نے ہمیشہ ملک کے دفاع میں کلیدی کردار ادا کیا ہے۔ گورنر سندھ نے 10مئی کو پاک فضائیہ کی جانب سے دشمن کو دیے گئے موثر جواب کا حوالہ دیتے ہوئے کہا کہ وہ لمحہ پوری قوم کے لیے فخر کا باعث بنا اور تاریخ میں سنہری الفاظ سے یاد رکھا جائے گا۔ انہوں نے مزید کہا کہ پاک فضائیہ ہر چیلنج کا بھرپور جواب دینے کی مکمل صلاحیت رکھتی ہے اور اس کی کامیابیاں قومی وقار کی علامت ہیں۔