دھوکا دہی، شلپا اور راج کندرا پر بھارت چھوڑنے پر پابندی عائد

معاملے کا کوئی فوجداری پہلو نہیں، یہ پرانا لین دین ہے اوریہ خالصتا سول نوعیت کا ایشو ہے،وکیل

اتوار 7 ستمبر 2025 10:45

ممبئی(اُردو پوائنٹ اخبارتازہ ترین - این این آئی۔ 07 ستمبر2025ء)بالی وڈ اداکارہ شلپا شیٹی اور شوہر راج کندرا کو 60 کروڑ روپے کے دھوکا دہی کیس میں نوٹس جاری کر دیا گیا۔شکایت کنندہ دیپک کوٹھاری نے الزام لگایا کہ جوڑے نے 60 کروڑ کا دھوکا دیا، جس کے بعد ممبئی پولیس نے لک آوٹ نوٹس جاری کیا ہے۔

(جاری ہے)

شکایت کنندہ نے کہا کہ دھوکا دہی کا یہ معاملہ شلپا شیٹی اور راج کندرا کی بند ہو چکی کمپنی بیسٹ ڈیل ٹی وی پرائیویٹ لمیٹڈ سے جڑا ہے، ملزمان نے پہلے قرض مانگا اور پھر اسے سرمایہ کاری دکھا کر ماہانہ منافع کا جھانسا دیا، جوڑے نے 2015 تا 2023 یعنی 8 سال کے دوران کاروباری سرمائے کے نام پر رقم لی مگر اسے ذاتی اخراجات پر خرچ کیا۔

شکایت کنندہ نے بتایا کہ شلپا شیٹی نے 2016 میں بطور ڈائریکٹر کمپنی سے استعفی دیا، جس کے بعد کمپنی دیوالیہ ہوگئی۔ممبئی پولیس کے اکنامک افیئر ونگ میں دائر معاملے میں لک آوٹ سرکلر امیگریشن حکام کو جاری کیا گیا تاکہ زیر تفتیش جوڑے کو ملک چھوڑنے سے روکا جاسکے۔راج کندرا اور شلپا شیٹی کے وکیل نے الزام کو مسترد کیا اور کہا کہ معاملے کا کوئی فوجداری پہلو نہیں، یہ پرانا لین دین ہے اوریہ خالصتا سول نوعیت کا ایشو ہے۔