یو اے ای نیول فورسز کے کمانڈر کی سربراہ پاک فضائیہ سے ملاقات،علاقائی سلامتی اور مشترکہ تربیتی اقدامات اور فوجی تعاون پر تبادلہ خیال

پیر 8 ستمبر 2025 20:34

راولپنڈی (اُردو پوائنٹ اخبارتازہ ترین - این این آئی۔ 08 ستمبر2025ء) یو اے ای نیول فورسز کے کمانڈر میجر جنرل حمید محمد عبداللہ الرمیتھی نے ایئر ہیڈ کوارٹرز اسلام آباد میں سربراہ پاک فضائیہ سے ملاقات کی جس میں علاقائی سلامتی اور مشترکہ تربیتی اقدامات اور فوجی تعاون پر تبادلہ خیال کیا گیا۔آئی ایس پی آر کے مطابق یو اے ای نیول فورسز کے کمانڈر کی پاک فضائیہ کے سربراہ ایئر چیف مارشل ظہیر احمد بابر سدھو سے ملاقات ہوئی۔

ملاقات میں علاقائی سلامتی اور مشترکہ تربیتی اقدامات اور فوجی تعاون پر تبادلہ خیال کیا گیا، سربراہ پاک فضائیہ نے جدید، ٹیکنالوجی سے ہم آہنگ فضائیہ بنانے کے ویژن پر بریفنگ دی۔ملاقات کے دوران سائبر، سپیس، اے آئی اور الیکٹرانک وارفیئر میں اپ گریڈیشن پروگرامز پر تبادلہ خیال کیا گیا۔

(جاری ہے)

سربراہ پاک فضائیہ نے دونوں ممالک کے درمیان گہرے مذہبی اور تاریخی تعلقات کو اجاگر کیا، فوجی تعاون، بالخصوص تربیت اور مشترکہ آپریشنل مشقوں کے شعبوں میں پاکستان کے غیر متزلزل عزم پر زور دیا۔

کمانڈر یو اے ای نیول فورسز نے پرتپاک استقبال اور شاندار مہمان نوازی پر ایئر چیف کا تہہ دل سے شکریہ ادا کیا، کمانڈر یو اے ای نیول فورسز نے پاک فضائیہ کی ٹیکنالوجی اور استعداد کار کی تعریف کی۔آئی ایس پی آر کیمطابق معزز مہمان نے پاک فضائیہ کے ساتھ مشترکہ مشقوں اور تربیتی تعاون میں گہری دلچسپی کا اظہار کیا اور کہا کہ پی اے ایف کا آپریشنل فریم ورک اور جنگی نظریہ علاقائی اور بین الاقوامی شراکتداروں کیلئے انمول ہے۔

کمانڈر یو اے ای نیول فورسز نے کہا کہ یو اے ای فضائیہ، پاکستان میں مشترکہ تربیتی اقدامات میں حصہ لینے کے لیے بے تاب ہے۔معزز مہمان نے اس اقدام کو دونوں ممالک کے درمیان برادرانہ تعلقات کو مزید مستحکم کرنے میں ایک اہم سنگ بنیاد قرار دیا۔آئی ایس پی آر کے مطابق دونوں ممالک کی افواج نے دفاعی اور فوجی تعلقات مزید مضبوط بنانے کے عزم کا اعادہ کیا۔