ڈپٹی کمشنر راولپنڈی کی زیر صدارت انسداد ڈینگی کے حوالے سے اجلاس کا انعقاد

پیر 8 ستمبر 2025 21:00

راولپنڈی (اُردو پوائنٹ اخبارتازہ ترین - اے پی پی۔ 08 ستمبر2025ء) ڈپٹی کمشنر راولپنڈی کی زیر صدارت انسداد ڈینگی کے حوالے سے ایک اہم اجلاس منعقد ہوا۔ اجلاس میں اسسٹنٹ کمشنرز، سی ای او ہیلتھ، محکمہ تعلیم، واسا، سالڈ ویسٹ مینجمنٹ کمپنی، میونسپل کارپوریشن اور دیگر متعلقہ محکموں کے افسران نے شرکت کی۔اجلاس میں ضلع بھر میں ڈینگی کی موجودہ صورتحال اور جاری انسداد ڈینگی سرگرمیوں کا تفصیلی جائزہ لیا گیا۔

ڈپٹی کمشنر ڈاکٹر حسن وقار چیمہ نے ہدایت کی کہ تمام تحصیلوں میں سویپنگ، لاروا سرویلنس، فوگنگ، صفائی ستھرائی اور نکاسی آب کے کام کو تسلسل کے ساتھ روزانہ کی بنیاد پر مؤثر انداز میں جاری رکھا جائے۔ انہوں نے کہا کہ انسداد ڈینگی اقدامات میں کسی قسم کی کوتاہی برداشت نہیں کی جائے گی اور تمام محکمے اپنی ذمہ داریاں بھرپور انداز میں ادا کریں۔

(جاری ہے)

ڈپٹی کمشنر نے مزید کہا کہ شہریوں کی آگاہی اور شمولیت کے بغیر ڈینگی پر قابو پانا ممکن نہیں، اس لیے کمیونٹی موبلائزیشن مہمات میں مزید تیزی لائی جائے۔ عوام کو اپنے گھروں اور اردگرد کے ماحول کو صاف ستھرا رکھنے اور پانی جمع نہ ہونے دینے کی ہدایت کی گئی۔اجلاس میں فیصلہ کیا گیا کہ ضلعی انتظامیہ، محکمہ صحت اور دیگر ادارے باہمی تعاون کو مزید مؤثر بنائیں گے۔ متاثرہ علاقوں میں خصوصی ٹیمیں تعینات کی جائیں گی جو فوری کارروائی کو یقینی بنائیں گی۔ تمام اسسٹنٹ کمشنرز کو ہدایت دی گئی کہ وہ انسداد ڈینگی سرگرمیوں کی روزانہ رپورٹ براہِ راست ڈپٹی کمشنر آفس میں جمع کروائیں۔