شیخوپورہ ،فوڈ سیفٹی ٹیموں کے چھاپے ،حفظان صحت کے اصولوں کی خلاف ورزی اور صفائی کے ناقص انتظامات پر 90 ہزار روپے سے زائد کا جرمانہ عائد

منگل 9 ستمبر 2025 12:05

شیخوپورہ (اُردو پوائنٹ اخبارتازہ ترین - اے پی پی۔ 09 ستمبر2025ء) ڈپٹی کمشنر شیخوپورہ شاہد عمران مارتھ کی ہدایت پر پنجاب فوڈ اتھارٹی شیخوپورہ کی فوڈ سیفٹی ٹیمیں معیاری خوراک کی فراہمی کو یقینی بنانے کے لئے فیلڈ میں مکمل متحرک ، ضلع بھر میں خوراک سے منسلک 96 کاروباروں کا معائنہ کیا گیا ، حفظان صحت کے اصولوں کی خلاف ورزی اور صفائی کے ناقص انتظامات پر 90 ہزار روپے سے زائد کا جرمانہ عائد کیا معیاری دودھ کی فراہمی کو یقینی بنانے کے لئے ضلع شیخوپورہ کے مختلف علاقوں میں چیکنگ کے دوران 45 ہزار 910 لٹر دودھ کو چیک کیا گیا۔

دودھ کو دودھ کے معیار کے مطابق نہ ہونے پر 1 ہزار 125لیٹر دودھ کو موقع پر تلف کیا گیا ۔ مزید براں مضر صحت غیر معیاری اور ممنوع زائد المیعاد اشیاء خورد نوش جن میں 25 کلو مصالحہ جات ، 1.8 کلو چائنہ نمک ، 28 کلو گوشت ، 0.669 کلوگرام دیگر زائد المیعاد اشیاء اور بیکری آئٹمز کو موقع پر تلف کیا گیا۔

(جاری ہے)

4 فوڈ پوائنٹ کو سیل کیا گیا 2 فوڈ پوائنٹ مالکان کے خلاف مقدمہ درج کروایا گیا اور متعدد فوڈ پوائنٹس کو اصلاحی نوٹس بھی جاری کیے گئے۔

ڈپٹی کمشنر شیخوپورہ شاہد عمران مارتھ نے پنجاب فوڈ اتھارٹی کی ٹیموں کی مضر صحت اشیاء کی خریدوفروخت کرنے والوں کے خلاف کاروائیوں بارے گفتگو کرتے ہوئے کہا کہ عوام الناس کو صاف ستھری خوراک کی فراہمی پنجاب فوڈ اتھارٹی کی اولین ترجیح ہونی چاہیے، پنجاب فوڈ اتھارٹی ہمیشہ کی طرح لوگوں کو صاف ستھری اور معیاری خوراک کی فراہمی کے لیے دن رات کوشاں ہے ۔\378