میجرعدنان اسلم شہید کی نمازجنازہ چکلالہ راولپنڈی میں ادا کردی گئی

منگل 9 ستمبر 2025 20:58

راولپنڈی (اُردو پوائنٹ اخبارتازہ ترین - این این آئی۔ 09 ستمبر2025ء)میجرعدنان اسلم شہید کی نمازجنازہ چکلالہ راولپنڈی میں ادا کردی گئی جس میں وزیراعظم شہبازشریف ،وزیر دفاع، وزیر اطلاعات، فیلڈ مارشل عاصم منیر سمیت دیگر اعلی عسکری و سول افسران اور شہید کے اہل خانہ نے شرکت کی ۔آئی ایس پی آر کے مطابق میجر عدنان 2ستمبر کو بنوں میں فتنہ الخوارج کے بزدلانہ حملے میں شدید زخمی ہوئے تھے، میجر عدنان سی ایم ایچ راولپنڈی میں زیر علاج تھے،دوران علاج جام شہادت نوش کر گئے۔

(جاری ہے)

میجرعدنان اسلم نے دشمن کیخلاف بے مثال بہادری کا مظاہرہ کرتے ہوئے قیادت کا حق ادا کیا، میجرعدنان اسلم کو مکمل فوجی اعزاز کے ساتھ ان کے آبائی علاقے میں سپرد خاک کیا جائے گا۔وزیراعظم شہبازشریف نے میجرعدنان اسلم کی جرات و قربانی کو خراج عقیدت پیش کیا اور کہا کہ آج ہم نے مادرِ وطن کا ایک بہادر بیٹا کھو دیا ہے، بہادر بیٹے کی قربانی ہمیشہ قوم کے دلوں میں زندہ رہے گی، وہ بہترین روایات کا مظہرتھا،وطن سے محبت،غیر متزلزل عزم اور قربانی کا جذبہ، شہادت اس بات کا ثبوت ہے مسلح افواج دہشتگردی کے خاتمے کیلئے پر عزم ہیں۔