کس نے کہا کہ میری امریکا میں پراپرٹی شوکت خانم کی فنڈ ریزنگ سے خریدی گئی علیمہ خان

ْہم ٹیکسٹائل کے ایکسپورٹر ہیں، صحافی کا کام ہے اگر اس کے پاس ثبوت ہے تو سامنے لائے،گفتگو

منگل 9 ستمبر 2025 21:25

راولپنڈی (اُردو پوائنٹ اخبارتازہ ترین - این این آئی۔ 09 ستمبر2025ء)بانی پی ٹی آئی کی بہن علیمہ خان نے سوال اٹھایا ہے کہ یہ کس نے کہا میری امریکا میں پراپرٹی شوکت خانم کی فنڈ ریزنگ سے خریدی گئی ۔راولپنڈی میں داہگل ناکے پر اپنی بہن نورین نیازی کے ہمراہ میڈیا سے گفتگو میں انہوں نے کہا کہ میری یہ پراپرٹی حق حلال کے پیسوں کی ہے، ٹیکسٹائل کا کاروبار ہے، ہم ٹیکسٹائل کے ایکسپورٹر ہیں، صحافی کا کام ہے اگر اس کے پاس ثبوت ہے تو سامنے لائے۔

علیمہ خان نے صحافیوں سے کہا کہ آپ غیر متعلقہ سوال کر کے ٹیکسٹائل کے کاروبار کو نقصان پہنچا رہے ہیں، ایکسپورٹ کا کاروبار کرنے والوں پر آپ الزام لگا رہے ہیں۔انہوں نے گذشتہ روز صحافیوں پر ہوئے تشدد کی مذمت کرتے ہوئے کہا کہ گزشتہ روز جو بھی ہوا ساری چیزوں کی مذمت کرتی ہوں، یہ سب جان بوجھ کر کیا جا رہا ہے، جان بوجھ کر لوگوں کو اشتعال دلایا گیا۔

(جاری ہے)

بانی پی ٹی آئی کی ہمشیرہ نے کہا کہ میں نے اپنے بیٹوں کو بھی یہاں آنے سے روکا، وہ آتے تو کیا حال ہوتا، وہ آتے تو ان پر بھی دہشت گردی کے پرچے کٹ جاتے۔انہوںنے کہاکہ دو چار لوگ یہاں آتے ہیں جو جان بوجھ کر بدتمیزی کرتے ہیں، یہ سب جان بوجھ کر کیا جا رہا ہے، کسی کو مارنا نہیں چاہیے تھا، نہ لڑائی جھگڑا ہونا چاہیے تھا۔علیمہ خان نے سوال کیا کہ اگر میں نے اپنے اوپر انڈا خود پھینکوایا تو پولیس ان دو خواتین کو بچا کر کیوں لے گئی ہم پر انڈے پھینکے جائیں یا اور کوئی تذلیل کی جائے ہمیں کوئی فکر نہیں۔