کراچی، فائرنگ سے شہری قتل، ہاکس بے روڈ پر علاقہ مکینوں کا شدید احتجاج

جمعرات 11 ستمبر 2025 17:55

کراچی(اُردو پوائنٹ اخبارتازہ ترین - این این آئی۔ 11 ستمبر2025ء)شہر قائد میں ماری پور کے علاقے میں فائرنگ کے واقعے میں ولی نامی شہری کے قتل کے بعد علاقہ مکینوں نے شدید احتجاج کیا۔مظاہرین نے ہاکس بے روڈ پر ٹائر جلا کر دھرنا دے دیا ہے اور انتظامیہ کے خلاف شدید نعرے بازی کی، دھرنے کی وجہ سے گاڑیوں کی طویل قطاریں لگ گئی ہیں۔

(جاری ہے)

مظاہرین نے کہا کہ جب تک قاتلوں کو گرفتار نہیں کیا جاتا، احتجاج جاری رہے گا۔

انہوں نے مطالبہ کیا کہ ایس ایچ او ماری پور کو فوری طور پر معطل کر کے اس کی جگہ ایک ایماندار افسر تعینات کیا جائے۔علاقہ مکینوں نے شکایت کی کہ ماری پور تھانے کو کافی دور منتقل کر دیا گیا ہے، جس کی وجہ سے عوام کو شکایات درج کرانے میں شدید مشکلات کا سامنا ہے۔مظاہرین نے مطالبہ کیا کہ تھانے کو دوبارہ پرانی جگہ پر منتقل کیا جائے تاکہ عوام کو فوری اور آسان رسائی حاصل ہو۔