ملکسیکرٹری دفاع لیفٹیننٹ جنرل (ر) محمد علی نےملک بھر کے 43 کینٹونمنٹس میں صحت کی بہترین سہولیات کی فراہمی کے لیے ہیلتھ پالیسی 2025 کی منظوری دے دی

راولپنڈی (اُردو پوائنٹ اخبارتازہ ترین - اے پی پی۔ 12 ستمبر2025ء) سیکرٹری دفاع لیفٹیننٹ جنرل (ر) محمد علی نےملک بھر کے 43 کینٹونمنٹس میں صحت کی بہترین سہولیات کی فراہمی کے لیے ہیلتھ پالیسی 2025 کی منظوری دے دی ہے، جس کے تحت جدید معیار کے مطابق طبی انفراسٹرکچر کی اپ گریڈیشن، تشخیص و علاج میں جدید ٹیکنالوجی کا انضمام اور ماہر طبی عملے کی بھرتی و تربیت کے اقدامات شامل ہیں۔

یہ ایک ہمہ جہت اور انقلابی اقدام ہے جو کینٹونمنٹس میں صحت کی خدمات کے نظام کو جدید خطوط پر استوار کرنے میں اہم کردار ادا کرے گا۔اس پالیسی کی تیاری میں ڈائریکٹر کینٹونمنٹ ایڈمنسٹریشن رانا خلیل کی انتھک کوششیں شامل ہیں۔ ان کی محنت سے تیار کردہ یہ جامع اور باریک بینی سے مرتب کردہ پالیسی دستاویز بنیادی سطح پر صحت کی سہولیات کی فراہمی کے لیے ایک نیا معیار قائم کرتی ہے۔

(جاری ہے)

ہیلتھ پالیسی 2025 کے تحت سب سے نمایاں تبدیلی طبی عملے کو برسوں سے محروم رہنے والے انتظامی اختیارات دینا ہے تاکہ ان میں پیشہ ورانہ اعتماد اور جذبۂ خدمت میں اضافہ ہو۔ اس سے طبی عملہ زیادہ مؤثر، بروقت اور ذمہ دارانہ انداز میں عوام کو صحت کی سہولیات فراہم کر سکے گا۔پالیسی پر حقیقی روح کے ساتھ عملدرآمد سے کینٹونمنٹس میں رہنے والے تمام شہریوں کے لیے معیاری اور یکساں صحت سہولیات دستیاب ہوں گی، جو ماضی میں مختلف مسائل کی وجہ سے ممکن نہیں ہو پاتی تھیں۔

ہیلتھ پالیسی 2025 تین اہم ستونوں پر مبنی ہے: پہلا، صحت کے انفراسٹرکچر کو جدید عالمی معیار کے مطابق اپ گریڈ کرنا۔ دوسرا، تشخیص اور علاج کے نظام میں جدید ٹیکنالوجیز کو شامل کرنا تاکہ بیماریوں کی بروقت اور درست تشخیص ممکن ہو۔ تیسرا، ہنر مند اور ماہر طبی عملے کی بھرتی اور تربیت کے ذریعے ادارہ جاتی صلاحیت کو مضبوط بنانا۔ان اقدامات سے طبی سہولیات کو زیادہ موثر، فعال اور عوام دوست بنایا جائے گا تاکہ کینٹونمنٹس کے باسیوں کو صحت کی بہترین اور جدید سہولیات میسر ہوں۔

پالیسی میں کمیونٹی کی شمولیت اور بااختیاری کو بھی کلیدی حیثیت دی گئی ہے۔ اس بات کو تسلیم کیا گیا ہے کہ پائیدار صحت اصلاحات اس وقت تک ممکن نہیں جب تک مقامی کمیونٹیز اس عمل میں شامل نہ ہوں۔ اسی لیے پالیسی کے تحت مقامی آبادی کے ساتھ مضبوط شراکت داری کو فروغ دیا جائے گا۔اس تعاون کا مقصد عوامی ضروریات کے مطابق صحت کی خدمات کو ڈھالنا اور باہمی اعتماد کو بڑھانا ہے تاکہ شہری اپنی صحت کے نظام کو اپنی ضروریات سے ہم آہنگ دیکھ سکیں۔

ترجمان کے مطابق ہیلتھ پالیسی 2025 محض ایک انتظامی اصلاح نہیں بلکہ ایک دور رس اور انقلابی اقدام ہے۔ یہ کینٹونمنٹس کے باسیوں کو معیاری، قابلِ اعتماد اور جدید طبی سہولیات کی فراہمی کو یقینی بنانے کا عزم رکھتی ہے۔یہ پالیسی ایم ایل اینڈ سی جی کے اس غیر متزلزل عزم کی عکاس ہے کہ کینٹونمنٹس میں صحت مند، خوشحال اور بااختیار کمیونٹیز پروان چڑھائی جائیں تاکہ عوام کو ایک بہتر اور محفوظ مستقبل فراہم کیا جا سکے۔