Live Updates

ڈپٹی کمشنر ننکانہ صاحب محمد تسلیم اختر راؤ نے صحافی برادری کے ہمراہ سیلابی علاقوں کا دورہ کیا

جمعہ 12 ستمبر 2025 14:10

ننکانہ صاحب (اُردو پوائنٹ اخبارتازہ ترین - اے پی پی۔ 12 ستمبر2025ء) ڈپٹی کمشنر ننکانہ صاحب محمد تسلیم اختر راؤ نے صحافی برادری کے ہمراہ سیلابی علاقوں کا دورہ کیا۔ ڈی سی نے میڈیا نمائندگان کے ہمراہ بچوکی پار اور ہیڑے کے سیلابی علاقوں کادورہ کیا۔ڈپٹی کمشنر اور میڈیا نمائندگان نے طویل پیدل سفر کرکے جٹاں دا واڑہ کے سیلابی علاقوں میں پانی کی صورتحال کا جائزہ لیا۔

ڈپٹی کمشنر نے فلڈ ریلیف کیمپس میں سہولیات کی فراہمی کا جائزہ بھی لیا۔انہوں نے سیلاب متاثرین میں راشن ، کپڑے ، کھانا اور پانی بھی تقسیم کیا ، کشتی میں سفر کرکے مختلف دیہاتوں میں پانی کی سطح کا جائزہ لیا اور متاثرین میں کھانا تقسیم کیا۔ اس موقع پر ڈپٹی کمشنر محمد تسلیم اختر راؤنےمیڈیا نمائندگان سے گفتگو کرتے ہوئے کہا کہ سیلاب متاثرین کے جانوروں کے لیے ونڈے اور چارے کی فراہمی کو بھی یقینی بنایا جا رہا ہے۔

(جاری ہے)

وزیر اعلیٰ پنجاب مریم نواز شریف کی ہدایت پر سیلاب متاثرین کی بحالی کے اقدامات کو تیز کر دیا گیا ہے۔ڈی سی ننکانہ نے بتایا کہ سیلاب سے 121 موضع جات کے 36 ہزار سے زائد افراد متاثر ہوئے،ضلع ننکانہ میں سیلاب سے کوئی جانی نقصان نہیں ہوا اور نہ ہی کسی جانور کی موت ہوئی۔سیلابی پانی سے تمام آبادیوں سے انسانوں اور جانوروں کا انخلاءبروقت یقینی بنایا گیا تھا۔

سیلاب سے تباہ ہونے والے روڑز کی بحالی کا عمل بھی جاری ہے۔ڈپٹی کمشنر نے بتایا کہ سیلاب متاثرین کو پکا پکایا کھانا ، صاف پانی اور دیگر سہولیات کی فراہمی بلاتعطل جاری ہے۔سیلاب متاثرین کے نقصانات کا تخمینہ لگانے کے لیے ٹیمیں تشکیل دے دی گئی ہیں۔حکومت پنجاب سیلاب متاثرین کے نقصانات کا پورا ازالہ کرے گی۔انہوں نے کہا کہ متاثرہ دیہاتوں سے سیلابی پانی کے انخلاءکے لیے تمام وسائل کو بروئے کار لا رہے ہیں۔سیلاب سے متاثرہ دیہاتوں کے لوگوں کو ٹرانسپورٹ کی سہولیات مہیا کر رہے ہیں۔ \378