جنگ ستمبر1965ء کے ہیرو میجر راجہ عزیز بھٹی شہید (نشانِ حیدر)کا 60واں یومِ شہادت منایاگیا

جمعہ 12 ستمبر 2025 15:33

لاہور (اُردو پوائنٹ اخبارتازہ ترین - این این آئی۔ 12 ستمبر2025ء)جنگ ستمبر1965ء کے ہیرو میجر راجہ عزیز بھٹی شہید (نشانِ حیدر)کا 60واں یومِ شہادت منایاگیا۔قوم نے آج 60 سال قبل لاہور میں برکی کے محاذ پر بطور کمپنی کمانڈر جام شہادت نوش کرنے والے عزیز بھٹی کا یوم شہادت منایا۔میجر راجہ عزیز بھٹی نے پانچ دن (6 تا 10ستمبر) تک دشمن کے متعدد حملوں کو کامیابی سے پسپا کیا۔

میجر راجہ عزیز بھٹی جنگ کے دوران لاہور کے قریب بی آر بی نہر کے کنارے سے دشمن کی حرکات و سکنات کا جائزہ لے رہے تھے کہ اس دوران دشمن کے ایک ٹینک کا گولہ براہِ راست آلگا جس سے آپ نے موقع پر جامِ شہادت نوش کیا۔میجر راجہ عزیز بھٹی شہید کی لازوال قربانی کی بدولت دشمن لاہور کی جانب پیش قدمی نہ کر سکا۔شہید میجر راجہ عزیز بھٹی کے 60ویں یوم شہادت کے حوالے سے بری فوج کے ترجمان آئی ایس پی آر کی جانب سے خصوصی بیان جاری کیا گیا ہے جس میں فیلڈ مارشل، چیئرمین جوائنٹ چیفس آف اسٹاف کمیٹی، نیول اور ایئرچیف کی جانب سے عزیز بھٹی شہید کو خراج عقیدت پیش کیا گیا۔

(جاری ہے)

بیان میں کہا گیا کہ مسلح افواج میجر راجہ عزیز بھٹی کی لازوال بہادری اور قربانی کو شاندار خراجِ عقیدت پیش کرتی ہیں۔1965ء کی جنگ میں میجر راجہ عزیز بھٹی نے لاہور کے قریب برکی سیکٹر کا دفاع کیا، وہ مسلسل پانچ دن دشمن کے بھرپور حملوں کے خلاف آہنی دیوار بنے رہے۔