Live Updates

انسانیت کی خدمت اور فلاح عامہ مصطفویؐ تعلیمات کا ناگزیر جزو ہے،علامہ رانا محمد ادریس

جمعہ 12 ستمبر 2025 16:53

لاہور (اُردو پوائنٹ اخبارتازہ ترین - اے پی پی۔ 12 ستمبر2025ء) منہاج القرآن انٹرنیشنل کے نائب ناظم اعلیٰ علامہ رانا محمد ادریس نے کہا ہے کہ انسانیت کی خدمت اور فلاح عامہ مصطفوی تعلیمات کا ناگزیر جزو ہے، آقا کریم صلی اللہ علیہ وسلم کی ولادت منانے اور اظہار عقیدت و محبت کا بہترین طریقہ اس وقت سیلاب متاثرین کی مدد اور دکھی انسانیت کی خدمت ہے۔

جامع شیخ الاسلام ماڈل ٹاؤن لاہور میں جمعة المبارک کے اجتماع سے خطاب کرتے ہوئے علامہ محمد ادریس کا کہنا تھا کہ سیلاب کی ناگہانی آفت کی وجہ سے ہزاروں خاندان بے گھر ہوچکے ہیں،ان کے مال و اسباب سیلاب میں بہہ گئے،یہاں تک کہ بعض خاندانوں کی بیٹیوں کے جہیز اور ان کے استعمال کی ضروری اشیا بھی پانی میں بہہ گئی ہیں،انسانیت کے ناطے مخیر حضرات پر یہ لازم ہے کہ وہ متاثرین کی مدد کریں اوراظہار تشکر کریں کہ اللہ تعالی نے انہیں اس آفت سے محفوظ رکھا۔

(جاری ہے)

انہوں نے کہا کہ ڈاکٹرز و طبی عملہ متاثرہ مقامات پر خدمت انجام دے کر اپنا فرض نبھائیں، مشکل کا شکار لوگوں کی مدد کرنا ہی اصل اسلام ہے۔انہوں نے کہا کہ شیخ الاسلام ڈاکٹر محمد طاہرالقادری نے عالمی میلاد کانفرنس کا پروگرام مینار پاکستان نہ کر کے اور انتظامی اخراجات کا پیسہ سیلاب متاثرین کو دینے کا اعلان کر کے یہ تعلیم دی ہے کہ اس وقت دکھی انسانیت سب سے زیادہ ہماری توجہ کی مستحق ہے۔