وزیرریلوے کا میجر عزیز بھٹی شہید کو خراج عقیدت، شہداء کی قربانیوں کو پاکستان کی اصل کہانی قرار دیا

جمعہ 12 ستمبر 2025 22:24

اسلام آباد (اُردو پوائنٹ اخبارتازہ ترین - آن لائن۔ 12 ستمبر2025ء) وفاقی وزیر ریلوے محمد حنیف عباسی نے 1965ء کی جنگ کے ہیرو، نشانِ حیدر میجر عزیز بھٹی شہید کو زبردست خراجِ عقیدت پیش کرتے ہوئے کہا ہے کہ میجر عزیز لاہور کے شیر تھے جنہوں نے دشمن کے ناپاک عزائم کو خاک میں ملا دیا۔ ی*اپنے بیان میں وفاقی وزیر نے کہا کہ میجر عزیز بھٹی شہید کی بے مثال بہادری اور قربانی آج بھی پاک فوج کے جوانوں کے لیے مشعلِ راہ ہے۔

(جاری ہے)

انہوں نے مزید کہا کہ جس تاریخ کو میجر عزیز بھٹی شہید نے اپنے خون سے رقم کیا، اسے میجر عدنان نے اپنی بہادری سے مزید آگے بڑھایا۔محمد حنیف عباسی نے کہا کہ میجر عزیز سے میجر عدنان تک، ہمارے جانبازوں نے ہمیشہ مادرِ وطن کے دفاع کے لیے قربانیاں دیں اور ہر محاذ پر دشمن کا ڈٹ کر مقابلہ کیا۔ ان کا کہنا تھا کہ پاک فوج کے جوانوں نے اپنی جانوں کا نذرانہ دے کر ملک کی حفاظت کی، اور انہی شہداء کی قربانیاں ہی درحقیقت پاکستان کی اصل کہانی ہیں۔وفاقی وزیر نے شہداء کے اہل خانہ کو بھی خراجِ تحسین پیش کرتے ہوئے کہا کہ پوری قوم اپنے بہادر سپوتوں کی قربانیوں کو ہمیشہ یاد رکھے گی اور ان پر فخر کرتی ہے۔