آثارِ قدیمہ پنجاب کا ہڑپہ کھدائی کے سو سال مکمل ہونے پر نئے سائنسی منصوبے کا اعلان

جمعہ 12 ستمبر 2025 23:40

لاہور (اُردو پوائنٹ اخبارتازہ ترین - اے پی پی۔ 12 ستمبر2025ء) ڈائریکٹوریٹ جنرل آف آرکیالوجی پنجاب نے ہڑپہ میں 1925 میں شروع ہونے والی پہلی باقاعدہ کھدائی کی سو سالہ یادگار کے موقع پر ایک بڑے اور سائنسی منصوبے کا اعلان کیا ہے جس کے تحت ہڑپہ سمیت پنجاب کے دیگر اہم تاریخی و قدیم مقامات پر نئی کھدائیاں کی جائیں گی۔ترجمان کے مطابق یہ اقدام پنجاب میں آثارِ قدیمہ کی سو سالہ روایت کو نئی سمت دینے کے ساتھ ساتھ تحقیق اور جدید سائنسی طریقوں کے ذریعے قدیم تہذیبوں کے مطالعہ کو مزید آگے بڑھائے گا۔

ہڑپہ میں کی جانے والی نئی کھدائیوں میں ڈیجیٹل میپنگ، سائنسی ڈیٹنگ اور جدید دستاویزی طریقے استعمال کیے جائیں گے تاکہ وادی سندھ کی تہذیب کو بہتر انداز میں دنیا کے سامنے پیش کیا جا سکے۔

(جاری ہے)

ترجمان کے مطابق منصوبے کے دوسرے مرحلے میں پنجاب آثارِ قدیمہ نے گندھارا کے تاریخی خطے میں بھی منظم کھدائیوں کا آغاز کرنے کا فیصلہ کیا ہے تاکہ پنجاب کی کثیر تہذیبی وراثت کو محفوظ اور اجاگر کیا جا سکے۔

یہ منصوبہ حکومتِ پنجاب کی مکمل سرپرستی میں شروع کیا جا رہا اور وزیراعلی مریم نواز نے اس بات پر زور دیا ہے کہ آثارِ قدیمہ کو علم اور ثقافتی شناخت کے ساتھ جوڑا جائے،اس سلسلہ میں سینئر وزیر پنجاب مریم اورنگزیب نے رہنمائی فراہم کی ہے کہ یہ اقدامات عالمی معیار کے مطابق ہوں۔ ڈائریکٹر جنرل آثار قدیمہ پنجاب ظہیر عباس ملک کا کہنا ہے کہ یہ کھدائیاں نہ صرف علمی دنیا میں نئی تحقیق کو فروغ دیں گی بلکہ پنجاب کو تحقیق، سیاحت اور ثقافتی فخر کا مرکز بنانے میں بھی اہم کردار ادا کریں گی۔