Live Updates

راوی ،ستلج ،چناب میں شدید سیلابی صورتحال سے 4700سے زائد موضع جات متاثر

دریائوں میں سیلابی صورتحال کے باعث مجموعی طور پر 45 لاکھ 74 ہزار لوگ متاثر ،104اموات ہوئیں

اتوار 14 ستمبر 2025 17:25

لاہور(اُردو پوائنٹ اخبارتازہ ترین - این این آئی۔ 14 ستمبر2025ء)پروونشل ڈیزاسٹر مینجمنٹ اتھارٹی نے دریائے راوی ،ستلج اور چناب میں سیلاب کے باعث ہونے والے نقصانات کی رپورٹ جاری کر دی ۔ریلیف کمشنر نبیل جاوید کے مطابق دریائے راوی ،ستلج اور چناب میں شدید سیلابی صورتحال کے باعث 4700سے زائد موضع جات متاثر ہو چکے ہیں ۔دریائے چناب میں سیلاب کے باعث مجموعی طور پر 2475 ،ستلج میں سیلاب کے باعث 715 ،دریائے راوی میں سیلاب کے باعث مجموعی طور پر 1458 موضع جات متاثر ہوئے۔

نبیل جاوید کے مطابق دریائوں میں سیلابی صورتحال کے باعث مجموعی طور پر 45 لاکھ 74 ہزار لوگ متاثر ہوئے،سیلاب میں پھنس جانے والے 25 لاکھ 16 ہزار لوگوں کو محفوظ مقامات پر منتقل کیا گیا۔ریلیف کمشنر نبیل جاوید کے مطابق شدید سیلاب سے متاثرہ اضلاع میں 372 ریلیف کیمپس قائم کیے گئے ہیں۔

(جاری ہے)

سیلاب سے متاثر ہونے والے اضلاع میں 459 میڈیکل کیمپس بھی قائم کیے گئے ہیں۔

مویشیوں کو علاج معالجے کی سہولت فراہم کرنے کے لیے 391 ویٹرنری کیمپس قائم کیے گئے ہیں۔متاثرہ اضلاع میں ریسکیو و ریلیف سرگرمیوں میں 20 لاکھ 20 ہزار جانوروں کو محفوظ مقامات پر منتقل کیا گیا۔ ریلیف کمشنر نبیل جاوید نے کے مطابق منگلا ڈیم 93 فیصد جبکہ تربیلا ڈیم 100 فیصد تک بھر چکا ہے،دریائے ستلج پر موجود بھارتی بھاکڑا ڈیم 88 فیصد تک بھر چکا ہے،پونگ ڈیم 94 فیصد جبکہ تھین ڈیم 88 فیصد تک بھر چکا ہے۔حالیہ سیلاب سے مختلف حادثات میں 104 شہری جاں بحق ہوئے۔وزیر اعلی پنجاب کی ہدایات کے پیش نظر شہریوں کے نقصانات کا ازالہ کیا جائے گا۔