Live Updates

پنجاب پولیس نے اب تک سیلاب متاثرہ علاقوں سے 07 لاکھ سے زائدشہریوں ، 06 لاکھ مویشیوں کو محفوظ مقامات پر منتقل کیا، ترجمان

اتوار 14 ستمبر 2025 20:50

لاہور (اُردو پوائنٹ اخبارتازہ ترین - اے پی پی۔ 14 ستمبر2025ء) انسپکٹر جنرل پولیس ڈاکٹر عثمان انور کی ہدایت پر پنجاب پولیس کا سیلاب سے متاثرہ علاقوں میں ریسکیو اینڈ ریلیف آپریشن جاری ہے جس کے تسلسل میں اب تک اب تک 07 لاکھ 09 ہزار 427 شہریوں متاثرہ شہریوں کو محفوظ مقامات پر منتقل کیا جا چکا ہے جبکہ سیلاب متاثرین کے 06 لاکھ 28 ہزار 918 مویشیوں کو بھی محفوظ مقامات پر منتقل کیا گیا ہے۔

ریسکیو اینڈ ریلیف آپریشن میں پنجاب پولیس کے 16 ہزار سے زائد افسران و اہلکار، 770 وہیکلز اور 40 کشتیاں حصہ لے رہی ہیں۔ سیلاب زدہ علاقوں سے اب تک 02 لاکھ 81 ہزار 531 مردوں، 02 لاکھ 30 ہزار 518 خواتین اور ایک لاکھ 97 ہزار 378 بچوں کو ریسکیو کیا گیا ہے۔آئی جی پنجاب ڈاکٹر عثمان انور نے کہا کہ ریسکیو اینڈ ریلیف آپریشن کے دوران سیف سٹی کی تھرمل امیجنگ ٹیکنالوجی اور ڈرون کیمرے استعمال کئے جا رہے ہیں تاکہ متاثرین کی بروقت مدد یقینی بنائی جا سکے۔

(جاری ہے)

ان کا مزید کہنا تھا کہ سیلاب زدہ علاقوں میں پٹرولنگ اور سرویلنس بھی بڑھا دی گئی ہے۔ترجمان پنجاب پولیس کے مطابق ملتان ریجن سے 02 لاکھ 95 ہزار 572 اور ڈی جی خان ریجن سے ایک لاکھ 98 ہزار 32 شہریوں کو ریسکیو کیا گیا ہے۔آئی جی پنجاب نے کہا کہ آخری شہری کی محفوظ مقام پر منتقلی تک ریسکیو اینڈ ریلیف آپریشن جاری رکھا جائیگا۔