کراچی‘ ایک گھنٹے کے دوران تین ٹریفک حادثات، خاتون سمیت 4 افراد جاں بحق

لانڈھی ہسپتال چورنگی کے قریب تیز رفتار واٹر ٹینکر نے موٹر سائیکل کو ٹکر مار دی، حادثے میں ماں اور بیٹا موقع پر ہی جاں بحق

پیر 15 ستمبر 2025 14:04

کراچی(اُردو پوائنٹ اخبارتازہ ترین - این این آئی۔ 15 ستمبر2025ء) کراچی میں ٹریفک حادثات کا سلسلہ نہ تھم سکا، صرف ایک گھنٹے کے دوران مختلف علاقوں میں پیش آنے والے تین حادثات میں خاتون سمیت 4 افراد جاں بحق جبکہ 2 زخمی ہوگئے۔پولیس حکام کے مطابق لانڈھی ہسپتال چورنگی کے قریب تیز رفتار واٹر ٹینکر نے موٹر سائیکل کو ٹکر مار دی، حادثے میں ماں اور بیٹا موقع پر ہی جاں بحق ہوگئے جبکہ دوسرا بیٹا زخمی ہوگیا، جاں بحق افراد کی شناخت رئیسہ اور ارمان جبکہ زخمی کی شناخت حسنین کے نام سے ہوئی ہے۔

دوسرا حادثہ ناردرن بائی پاس پر پیش آیا جہاں ڈمپر نے موٹر سائیکل کو روند ڈالا، حادثے میں شہباز نامی نوجوان جاں بحق جبکہ داؤد زخمی ہوگیا۔تیسرا واقعہ کراچی کے علاقے ڈیفنس فیز 8 کریک ویسٹا کے قریب پیش آیا، جہاں تیز رفتار گاڑی نے موٹر سائیکل کو ٹکر مار دی، حادثے میں یار جان نامی موٹر سائیکل سوار جاں بحق ہوگیا۔

(جاری ہے)

پولیس نے تینوں حادثات کی تفتیش شروع کر دی ہے جبکہ نعشوں کو قانونی کارروائی کیلئے ہسپتال منتقل کر دیا گیا ہے۔

دوسری جانب کراچی میں ٹریفک حادثات میں تشویشناک حد تک اضافہ ہو رہا ہے، ٹریفک پولیس مؤثر اقدامات کرنے میں ناکام نظر آ رہی ہے۔ریسکیو حکام کے مطابق رواں سال کے ابتدائی 9 ماہ میں مختلف ٹریفک حادثات میں 627 افراد زندگی کی بازی ہار چکے ہیں جبکہ 9,261 افراد زخمی ہوئے، جاں بحق افراد میں 483 مرد، 64 خواتین، 69 بچے اور 29 بچیاں شامل ہیں۔