ہم اپنی سلامتی کے تحفظ اور خود مختاری کے قیام کے لیے پرعزم ہیں، قطری وزیراعظم

ہفتہ 13 ستمبر 2025 13:46

دوحہ (اُردو پوائنٹ اخبارتازہ ترین - این این آئی۔ 13 ستمبر2025ء)قطر کے وزیراعظم اور وزیرِ خارجہ شیخ محمد بن عبدالرحمن بن جاسم آل ثانی نے امریکی حکام سے ملاقات میں زور دیا کہ ان کا ملک اپنی سلامتی کے تحفظ اور خود مختاری کو قائم رکھنے کے لیے ہر ممکن اقدام کرے گا، خاص طور پر اسرائیل کے اس حالیہ حملے کے بعد جس میں دوحہ میں حماس کے رہنماں کو نشانہ بنایا گیا۔

قطری وزارتِ خارجہ نے ایک بیان میں بتایا کہ شیخ محمد بن عبدالرحمن بن جاسم آل ثانی نے واشنگٹن میں امریکا کے نائب صدر جے ڈی وینس اور وزیرِ خارجہ مارکو روبیو سے ملاقات کی۔اس موقع پر انھوں نے کہا کہ قطر اپنی سلامتی اور خود مختاری کے تحفظ کے لیے تمام ضروری اقدامات کرے گا اور اسرائیل کی اس جارحیت کا جواب دینے میں ہچکچاہٹ نہیں برتے گا۔

(جاری ہے)

انھوں نے امریکا کے ساتھ قریبی شراکت داری اور قطر کی خود مختاری کے لیے اس کی حمایت کو سراہا اور خطے میں قیامِ امن کے لیے جاری کوششوں پر بھی روشنی ڈالی۔بیان کے مطابق ملاقات میں قطر اور امریکا کے درمیان قریبی تزویراتی تعلقات، ان کے فروغ کے امکانات اور خطے کی تازہ صورت حال پر تبادلہ خیال ہوا۔وزارتِ خارجہ نے بتایا کہ امریکی نائب صدر وینس نے ملاقات کے دوران قطر کے ساتھ یکجہتی کا اظہار کیا اور کہا کہ خطے کے تنازعات کا حل سفارت کاری کے ذریعے ہی ممکن ہے۔انھوں نے قطر کی جانب سے ثالثی کی کوششوں اور امن قائم کرنے میں فعال کردار کو سراہتے ہوئے کہا کہ امریکا، قطر کو ایک قابلِ اعتماد تزویراتی اتحادی سمجھتا ہے۔