پیپلز پارٹی متاثرہ ملازمین کی بحالی کے لئے اسمبلی میں قرارداد پیش کرے گی ، قادر خان مندوخیل

پیر 15 ستمبر 2025 15:45

اسلام آباد (اُردو پوائنٹ اخبارتازہ ترین - اے پی پی۔ 15 ستمبر2025ء) پاکستان پیپلز پارٹی کے سینئر رہنما قادر خان مندوخیل نے کہا ہے کہ پیپلز پارٹی ہمیشہ لوگوں کو روزگار فراہم کرتی ہے اور اب بھی لوگوں کو روزگار فراہم کرے گی ۔ ان خیالات کا اظہار انہوں نے پیر کو یہاں پریس کانفرنس سے خطاب کرتے ہوئے کیا۔ انہوں نے کہا کہ اگست 2022 کو تمام پارٹیوں کے ممبران پر مشتمل پارلیمانی کمیٹی بنائی گئی ، کنٹریکٹ ڈیلی ویجز تمام ملازمین کے لئے کمیٹی احکامات جاری کر سکتی تھی، ہم نے 72اداروں کے ساتھ 31 میٹنگز کیں۔

انہوں نے کہا کہ ڈیلی ویجز کی تنخواہ ہم نے 37000 کرنے کے احکامات دیئے ، ڈیوٹی کے دوران فوت ہونے والے ملازم کے بقایا جات اور لواحقین کو معاوضہ ادا کرنے کا فیصلہ صادر کیا ، ہماری کمیٹی پر کسی بھی پارٹی کی طرف سے ایک بھی اعتراض نہیں کیا گیا، کمیٹی نے کسی بھی قسم کا دباؤ قبول نہیں کیا ۔

(جاری ہے)

قادر خان مندوخیل نے کہا کہ قومی اسمبلی کی کمیٹی کی رولنگ کو ختم کرنا عدالتی دائرہ اختیار نہیں ، پیپلز پارٹی ان ملازمین کی بحالی کے لئے اسمبلی میں قرارداد پیش کرے گی ۔

انہوں نے کہا کہ پیپلز پارٹی ہمیشہ لوگوں کو روزگار فراہم کرتی ہے ، لوگوں کو روزگار فراہم کرنے پر پیپلز پارٹی کی قیادت نے اس کا خمیازہ بھگتاہے ، پیپلز پارٹی اب بھی لوگوں کو روزگار فراہم کرے گی ۔ قادر خان مندوخیل نے کہا کہ سابق سپیکر قومی اسمبلی راجہ پرویز اشرف نے کہا کہ جو پارلیمنٹ کی کمیٹی کے احکامات پر عمل نہیں کرے گا اس کو توہین پارلیمان کا نوٹس دیا جائے گا ۔