Live Updates

سیلاب سے متاثرہ علاقوں میں بجلی بحالی کا کام تیزی سے جاری

منگل 16 ستمبر 2025 14:56

اسلام آباد (اُردو پوائنٹ اخبارتازہ ترین - اے پی پی۔ 16 ستمبر2025ء) سیلاب سے متاثرہ علاقوں میں بجلی بحالی کا کام تیزی سے جاری ہے، مجموعی طور پر 51 گرڈ اور 543 فیڈرز متاثر ہوئے، 320 فیڈر مکمل اور 215 کو جزوی طور پر بحال کر دیا گیا ہے۔ سیلاب سے متاثرہ علاقوں میں بجلی بحالی پر پاور ڈویژن کی 16 ستمبر تک کی جاری رپورٹ کے مطابق فیسکو کے زیرِ انتظام علاقوں میں 28 گرڈ اور 81 فیڈرز متاثر ہوئے، متاثرہ فیڈرز میں 38 مکمل اور 42 جزوی طور پر بحال کردئیے گئے ہیں، فیسکو کے 60919 متاثرہ صارفین کی بجلی کی بحالی کا کام 16 سے 18 ستمبر تک مکمل کرنے کی توقع ہے۔

لیسکو کے 67 متاثرہ فیڈرز میں سے 65 مکمل اور 2 جزوی طور پر بحال ہوچکے ہیں، 863 متاثرہ صارفین کی بجلی کی بحالی کا کام 17 ستمبر تک مکمل کرنے کی توقع ہے، لیسکو کے زیرِ انتظام علاقے لاہور،ننکانہ اور شیخوپورہ میں بجلی کی بحالی کا کام مکمل کر لیا گیا ہے۔

(جاری ہے)

میپکو کے 180 متاثرہ فیڈرز میں سے 9 مکمل اور 164 جزوی طور پر بحال کر دیئے گئے ہیں ، میپکو کے زیرِ انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا۔

رپورٹ کے مطابق گیپکو کے 11 گرڈز اور 103فیڈرزمتاثر ہوئے ، متاثرہ فیڈرز میں سے 101 فیڈرز مکمل اور 2 جزوی طور پر بحال ہوچکے ہیں، گیپکو کے 327 متاثرہ صارفین کی بجلی بحالی کا کام سیلاب کا پانی اترنے پر مکمل کر لیا جائے گا۔اسی طرح پیسکو کے 87 فیڈرز مکمل اور 4 جزوی طور پر بحال کردئیے گئے ہیں، پیسکو کے زیرِ انتظام علاقے سوات، صوابی اور ڈی آئی خان میں بجلی کی بحالی کا کام مکمل ہو چکا ہے۔

ٹیسکو کے علاقے شمالی وزیرستان اور خیبر کے 18 فیڈرز متاثر ہوئے، ٹیسکو کے 17 فیڈر مکمل اور ایک فیڈر جزوی طور پر بحال کر دیا گیاہے، ٹیسکو کے 996 متاثرہ صارفین کی بجلی کی بحالی کا کام تقریباََ 16 ستمبر تک مکمل ہونے کی توقع ہے جبکہ ٹیسکو کے علاقے خیبر میں بجلی کی بحالی کا کام مکمل کرلیا گیا ہے۔ مزید برآں ہیزیکو کے زیرِ انتظام علاقے مانسہرہ کے 3 متاثرہ فیڈر مکمل طور پر بحال کر دیئے گئے ہیں۔ ترجمان پاور ڈویژن نے کہا ہے کہ متاثرہ علاقوں میں بجلی کی مکمل بحالی اولین ترجیح ہے اور اس کے لئے تمام وسائل بروئے کار لائے جا رہے ہیں۔