اندرون لاہور کی بحالی اور مری ڈویلپمنٹ پروگرام کا جائزہ

منگل 16 ستمبر 2025 22:10

لاہور (اُردو پوائنٹ اخبارتازہ ترین - آن لائن۔ 16 ستمبر2025ء) وزیر بلدیات ذیشان رفیق کی زیر صدارت سول سیکرٹریٹ میں ایک اجلاس کے دوران والڈ سٹی لاہور اتھارٹی (ڈبلیو سی ایل ای) کے تحت جاری سکیموں اور مری ڈویلپمنٹ پروگرام (ایم ڈی پی) کا جائزہ لیا گیا۔ سیکرٹری لوکل گورنمنٹ پنجاب شکیل احمد میاں نے اجلاس کو بریفنگ دی۔وزیر بلدیات ذیشان رفیق نے والڈ سٹی اتھارٹی کو ضروری ہدایات جاری کرتے ہوئے کہا کہ اندرون لاہور کے تاریخی ورثے کی بحالی پاکستان مسلم لیگ (ن) کے صدر میاں محمد نواز شریف اور وزیراعلی مریم نواز کا فوکس ہے چنانچہ لاہور کے تاریخی ورثے کی حفاظت کیلئے ‘‘لہر’’ پروگرام کے تحت متعدد سکیموں پر کام جاری ہے۔

انہوں نے کہا کہ لاہور شہر کے قدیم شاہ عالم، دہلی، موچی گیٹ کے قریب زیر زمین پارکنگ اور آرکیڈ بنائیں گے۔

(جاری ہے)

اسی طرح مغلیہ دور کی یادگار شالامار گارڈن اور ناصر باغ کے نزدیک بھی انڈرگرائونڈ پارکنگ فیسیلٹی بنے گی تاکہ تاریخی ورثے کو متاثر کئے بغیر وہاں سیاحوں اور اہل علاقہ کو سہولت فراہم کی جا سکے۔ ذیشان رفیق نے کہا کہ گوالمنڈی فوڈ سٹریٹ کو بحال کرنے کی تجویز پر غور کیا جا رہا ہے۔

انہوں نے خبردار کیا کہ اندرون لاہور شہر کا تاریخی ورثہ قیمتی قومی اثاثہ ہے کوئی منصوبہ جلدبازی میں مکمل نہ کیا جائے بلکہ تمام ترقیاتی سکیمیں احتیاط اور توجہ کے ساتھ مکمل ہونی چاہئیں۔ انہوں نے کہا کہ ‘‘لہر’’ LHARپروگرام کے تحت لاہور مال روڈ پر واقع پرانی ٹولنٹن مارکیٹ کی بھی تزئین و آرائش کی جائے گی۔وزیر بلدیات نے ایم ڈی پی میں پیشرفت کا جائزہ لیتے ہوئے اس بات پر اطمینان کا اظہار کیا کہ مری کے مال روڈ کو خوبصورت بنانے کا کام آخری مراحل میں ہے۔

انہوں نے کہا کہ دنیا کے بڑے سیاحتی مراکز کی طرز پر مری مال روڈ کے تجارتی مراکز اور ہوٹلز پر بھی رات کے وقت لائٹنگ ہوگی۔ ملکہ کوہسار کو ملکی اور غیرملکی سیاحوں کیلئے مزید پٴْرکشش بنائیں گے۔ مری کی تمام عمارتوں کی چھتوں پر پینٹ لازمی قرار دیا گیا ہے۔ حکومت کی جانب سے جاری ایس او پیز کے مطابق مری کی ہر چھت سبز یا سرخ رنگ کی ہونی چاہیئے۔ وزیر بلدیات نے اگلے ہفتے ‘‘لہر’’ اور مری ڈویلپمنٹ پروگرام پر دوبارہ اجلاس بھی طلب کیا ہے۔

Facebook Twitter Google + Share on Whatsapp

اندرون لاہور کی بحالی اور مری ڈویلپمنٹ پروگرام کا جائزہ

متعلقہ عنوان :

مزید قومی خبریں