سندھ کی 29 نشستوں پر ضمنی بلدیاتی انتخابات 24ستمبر کو ہوں گے

بدھ 17 ستمبر 2025 15:39

کراچی (اُردو پوائنٹ اخبارتازہ ترین - اے پی پی۔ 17 ستمبر2025ء) سندھ کے 14اضلاع کی 29نشستوں پر ضمنی بلدیاتی انتخابات 24ستمبرکو ہوں گے، اس سلسلے میں الیکشن کمیشن آف پاکستان نے پولنگ سٹیشنز کے اندر موبائل فون لے جانے پر پابندی عائد کردی ہے جبکہ صرف پریزائڈنگ افسران، اسسٹنٹ پریزائڈنگ افسران اور سکیورٹی اہلکاروں کو موبائل فون لے جانے کی اجازت ہو گی۔

(جاری ہے)

بدھ کو جاری اعلامیہ کے مطابق صوبائی الیکشن کمشنر سندھ اعجاز انور چوہان نے کہا کہ الیکشن کمیشن شفاف، غیر جانبداراور پرامن انتخابات کے انعقاد کے لئے مکمل اور دیر پا اقدامات کر رہا ہے۔ انہوں نے ڈسٹرکٹ ریٹرننگ افسران، ریٹرننگ افسران، سکیورٹی اہلکاروں اور متعلقہ حکام کو سختی سے ہدایات جاری کرتے ہوئے کہا کہ ضابطہ اخلاق کی خلاف ورزی کسی صورت برداشت نہیں کی جائے گی اور انتخابی قوانین اور ضابطہ اخلاق پر عمل درآمد ہر صورت یقینی بنایا جائے۔

الیکشن کمیشن کے مطابق الیکشنز ایکٹ 2017 کی شق نمبر 182 کے تحت پولنگ سے 48گھنٹے قبل کسی بھی قسم کے عوامی اجتماعات، کارنر میٹنگز اور جلسے جلوسوں پر بھی پابندی ہوگی، یہ پابندی 22 اور 23 ستمبر کی درمیانی شب سے پولنگ کے اختتام تک نافذ العمل رہے گی۔