راچڈیل میں پاکستانی کمیونٹی کے اعزاز میں شاندارعشائیہ

بدھ 17 ستمبر 2025 16:36

لاہور (اُردو پوائنٹ اخبارتازہ ترین - این این آئی۔ 17 ستمبر2025ء)بریگیڈیئر (ریٹائرڈ) ارشد ملک کی جانب سے راچڈیل کے مقامی ہال میں ایک پروقار اور شاندار عشائیہ کا اہتمام کیا گیا جس میں قونصل جنرل آف پاکستان مانچسٹر امتیاز فیروز گوندل، وائس چیئرپرسن اوورسیز پاکستانیز کمیشن پنجاب بیرسٹر امجد ملک اور سینئر صحافی و تجزیہ نگار سہیل وڑائچ کے اعزاز میں مقامی کمیونٹی کے رہنماؤں کو مدعو کیا گیا۔

مہمانانِ گرامی کا پرتپاک استقبال پھولوں کے گلدستوں اور بھرپور پذیرائی سے کیا گیا۔ بیرسٹر حمزہ امجد ملک نے مہمانوں کو خوش آمدید کہا اور کمیونٹی رہنماؤں کی شرکت پر شکریہ ادا کیا۔ اس عشائیہ میں جسٹس، ڈاکٹرز، بیرسٹرز، سالیسٹرز، سیاسی و کاروباری شخصیات سمیت کمیونٹی کے سرکردہ رہنما بڑی تعداد میں شریک ہوئے۔

(جاری ہے)

قونصل جنرل امتیاز فیروز گوندل نے خطاب کرتے ہوئے کہا کہ وہ پاکستانی کمیونٹی کی خدمت کے لیے پرعزم ہیں اور ان کے مسائل کے حل کے لیے ہر ممکن اقدامات کریں گے۔

انہوں نے یقین دلایا کہ مانچسٹر قونصلیٹ کمیونٹی کے ساتھ ہر قدم پر تعاون کرے گا۔بیرسٹر امجد ملک نے کہا کہ اوورسیز پاکستانیز کمیشن پنجاب سمندر پار پاکستانیوں کے مسائل کے حل اور ان کی فلاح و بہبود کو یقینی بنانے کے لیے بھرپور اقدامات کر رہا ہے۔ انہوں نے کمیونٹی کی خدمات کو خراجِ تحسین پیش کرتے ہوئے کہا کہ بیرون ملک مقیم پاکستانی ملکی معیشت کی ریڑھ کی ہڈی ہیں۔

سینئر صحافی سہیل وڑائچ اور دیگر مقررین نے پاکستان کی سیاسی صورتحال پر روشنی ڈالی اور بیرون ملک پاکستانیوں کے کردار کو سراہا۔ تقریب کے دوران دوستانہ اور خوشگوار ماحول رہا، جہاں حاضرین نے مہمانوں سے تبادلہ خیال کیا اور اپنی آراء پیش کیں۔تقریب کا اختتام تحائف کی تقسیم اور بریگیڈیئر (ریٹائرڈ) ارشد ملک کے شکریہ کے کلمات کے ساتھ ہوا۔ اس کامیاب تقریب نے پاکستانی کمیونٹی کو ایک پلیٹ فارم پر اکٹھا کر کے تعلقات کو مزید مضبوط بنانے میں اہم کردار ادا کیا۔اس پروقار تقریب کی نظامت کے فرائض معروف کاروباری شخصیت خواجہ کامران نے خوش اسلوبی سے انجام دیئے۔

Facebook Twitter Google + Share on Whatsapp

راچڈیل میں پاکستانی کمیونٹی کے اعزاز میں شاندارعشائیہ

متعلقہ عنوان :

مزید قومی خبریں